2023年9月12日
美股隔晚繼續造好，道指連升多日，但夜期跟ADR表現麻麻，港股今早低開。不過美滙指數無法衝破105，人民幣日前從多年低位反彈至7.30水平，似係阿爺出手做嘢，有傳人行收緊企業5000萬美元或以上購匯，並將該部分購滙審批權限集中到央行，以減緩人民幣跌勢，半日港股萬八關失而復得。
恒指低開80點，跌幅一度擴大至204點，見17892半日低位，其後A股低位回升，港股亦止跌回升，最多升49點，見18145半日高位，其後好淡爭持。半日恒指收報18098，微升2點；國指跌5點，報6292；恒科指升5 點，收4088。半日成交額只有454.92億元，咁嘅成交唔講得上有買盤趁低吸納，仍然係買賣兩閒。
藍籌股個別發展，金融股回穩，大笨象(00005)回升1.1%，友邦(01299)彈0.4%，相對近日累積跌幅，友邦彈力麻麻；港交所(00388)重返300大關，半日升0.8%。內銀及內險有升有跌， 招行(03968)半日跌1.2%，工行(01398)跟建行(00939)分別升0.8%及0.7%；平保(02318)持平無起跌。
至於大型科技股偏軟，阿里(09988)新任CEO宣布確立兩大戰略重心，但市場似乎聽唔入耳，半日股價跌1.7%；騰訊(00700)、美團(03690)、京東(09618)、百度(09888)半日跌少於1%，攜程(09961)再跌1.6%，績後持續下跌未能止血。蘋果公司今晚舉行新iPhone及iWatch發布會，但華為手機突破晶片障礙，日前推出市場大賣，國產手機再於內地掀起熱潮，小米(01810)半日升1.5%，重磅科技股佢表現算唔錯。
內房股又翻炒，路透引述消息人士報道，碧桂園(02007)近日召開債券持有人會議，審議8隻境內公司債展期方案中，有6隻獲通過，碧桂園抽升4.9%；其他內房股乘機落鑊，當中遠洋集團(03377)半日升三成，就連正榮(06158)8月銷量額跌逾四成，股價半日竟可升四成；恒大(03333)半日亦升14.3%，似乎係債務狀況愈曳愈要炒。之前阿Man講過，內房要還債又唔影響現金流的一個方法就係印公仔紙，推高股價再發新股畀債主，以股代債，債主收完股票再自行喺市場沽貨套現，股價炒上去亦合情合理。
大摩調高咗Tesla評級及目標價，股價隔晚升咗一成，市值升咗6000億美元，剛好就係大摩所講Tesla旗下超級計算機Dojo嘅價值，Tesla嘅升勢唔單止畀咗美股動力，亦為港股嘅電動車股帶嚟力量。龍頭比亞迪(01211)半日升3.8%，蔚小理三傻亦升2.4%至4.8%，零跑(09863)半日升4.4%。
港股喺人民幣靠穩下止跌，但中港兩地經濟表現強差人意，即使阿爺頻頻出招，但規模有限未能帶動股市回升。港股暫時叫做守一守萬八大關，但喺無利好消息，復加外資缺席，資金有限，反彈之勢難持久；相反，若再失萬八關，仍需繼續向下尋底，先向17300至17500尋找支持。守萬八關反彈，18300阻力唔少，要企穩十天及廿天線並不容易。
麥狄文
(徐狄怡‧證監會持牌人)
