2022年2月8日
隔晚美股回復平靜，經過上星期大坐過山車後，市場觀望企業業績，美股較為淡靜。不過港股就無咁平靜，美國商務部將33間中企業列入「未經核實」實體名單(Unverified List) ，觸發中港股市今早雙雙下跌，恒指一度跌近400點，失守多條移動平均線。
恒指低開31點，報24548，經已係半日高位，其後內地股市愈跌愈多，創深科板指數更跌4%，拖累恒指最多跌390點，見24188半日低位。恒指中午挨近低位收市，報24202，跌377點；國指報8456，跌132點；恒科指半日跌126點，報5403。
藍籌股大多受壓，不過金融類股份表現較好，友邦(01299)跟大笨象(00005)逆市上升，大笨象更升1.6%再創兩年高位。市場憂慮阿里巴巴(09988)隨時批股，股價噚日已插水，今日再跌3.5%，表現疲弱。ATMXJ其他成員亦難逃一跌，騰訊(00700)跟美團(03690)半日分別跌1.6%及4.1%；京東(09618)跟小米(01810)半日跌3%。
藥明生物(02269)旗下子公司被納入「未經核實」實體名單(Unverified List)，今早一度跌逾三成，其後幅收窄至22%宣布停牌，同系藥明巨諾(02126)跌4.6%算跌得少；藥明康德(02359)重創15.1%；其他內地CRO股亦受拖累，康龍化成(03759)插10.8%，泰格醫藥(03347)則挫5.3%，方達(01521)挫4.6%。
內地電池股龍頭寧德時代(300750.SZ)，半日大跌8.9%，拖累港股嘅電池股插水，贛鋒(01772)A股(002460.SZ)跌8.3%，H股則跌6%；比亞迪(01211)半日跌半成，其A股跌幅相若。口痕友話H股好唔爭氣，A股升嗰陣跟唔足，跌就跟到足兼有時跌突。除咗電池股，電力股亦唔精神，主要係煤價抽高拖累火電股表現，不過龍源電力(00916)明明係風電股，半日亦受累跌逾3%，回落至16元水平，16元邊呢啲位，又可以撈一撈貨，暫時此股都係炒上落，15.8至17呢個Range炒住高低都幾好執。
內需食品股逆市造好，之前阿Man推介過嘅萬洲國際(00288)今日終於到咗5.5呢個目標，搞足一個月先升嗰一成，等到頸都長，不過企得穩5.5樓上，升勢應該未完，有貨可以食半留半。
總括個市暫時失守咗幾條移動平均線，之前嘅升勢被干擾，但只要指數仲守得住24200水平，後市唔好睇得太淡，呢兩日回吐視為上周五急升後整固，呢個月仍然有機會向上挑戰24600-25000水平。
麥狄文
(徐狄怡‧證監會持牌人)
