2026年9月25日
國際油價及美國債息回復升勢，美股周四再度受壓，道指低開95點後，跌幅擴大至最多387點，其後有消息指，美國與伊朗探討分階段重啟霍爾木茲海峽方案，道指跌幅收窄，收市報51349，跌161點或0.31%，已連跌三個交易日；標指微跌1點或0.02%，報7704；納指由跌轉升，倒升3點或0.01%，報26939。
紐約聯儲銀行總裁John Williams表示，由於能源價格高企及人工智能(AI)投資推動需求，聯儲局喺降低通脹方面仍有好多工作要做，市場則解讀為Fed仍要繼續加息。另一方面，伊朗威脅如果再受到美國或以色列攻擊，將擴大中東戰爭至印度洋及其他地區，令達成協議重開霍爾木茲海峽蒙上陰影，油價再度回升。油債價回升，對股市當然係帶嚟負面影響，不過美股又唔係一面倒插水，強勢股仍然吸引資金撈貨，阿Man接咗735嘅META，就逆市升4.5%，另一個買盤放咗喺715影都無。至於MU又接得返1048，收市重上1080，暫時用個1000-1020做防守，睇下上唔上到去1100-1150。DELL喺550補返一注，520嘅買盤就唔中，暫時上返540，但要上返560，企到5MA同10MA，先可以安心。至於INTC同NBIS表現唔錯，繼續持有。
至於GOOG都係逆市微升，同樣地GOOG唔上返450企穩，都要金晴火眼望實。MSFT都係打算持有中長線，不過唔上返500樓上，當然坐得無咁舒服。AVAV有啲頭痛，160呢個阻力遲遲未企穩，唯有睇住個防守位先。MRVL暫時整固緊，總之240唔可以再穿，暫時持有。NQ呢兩日回一回，個RSI 2開始修正返，如要保持強勢，RSI 9同14，就會企到喺50樓上，噚晚盤前落到30400附近，大約係噚日推算嘅最後一個支持位就反彈。今晚個分水嶺繼續喺30700，估計都係呢個位上下三百點度整固下先，支持30600/30500/30400，阻力30800/30900/31000無變。
至於港股昨日窄幅上落，主要受下周二期指結算前，開始踏入轉倉高峰期影響，恒指低開184點後，見24648低位即收窄跌幅，全日僅於100點內上落，收市報24761，跌幅收窄至72點，成交更進一步縮減至1595億元，北水於中秋假期前成交額縮減至近9個月低位，但仍繼續錄得淨流入，已連續第十四個交易日錄得淨流入，但累計淨流入金額只有552.27億元，反映於今日內地股市休市前，觀望氣氛濃厚。由於港股交投愈見淡靜，缺乏增量資金入市，短期維持資金於不同板塊輪動，難以推動大市進一步向上，暫時恒指又再失守全部移動平均線，都預咗短線無乜運行。只不過無預計到今日個市一開就插水，恒指低開237點，報24523點，淡友隨即發動攻勢，跌幅最多擴大至485點，低見24275，穿埋上星期低位，其後跌勢稍為喘定，恒指喺24300水平爭持。半日成交喺北水缺席下，縮水至591.47億元，完全應驗咗阿Man講嘅陰乾市況。嚟緊又到內地黃金周假期，北水下周返嚟三日，星期五開始休市到10月8先至再恢復交易。
目前港股正受加息壓力上升影響，美債息高企，對港股提升估值構成威脅，而高債息亦刺激美匯指數上漲，根據過往經驗，強美元環境下，往往令港股等新興市場需面對資金外流壓力。另一方面，外資一直睇淡港股盈利前景，今年內已一再下調恒指每股盈利預測，導致預測市盈率已降至11.4倍，雖然此預測已略低於10年平均值約11.5倍，但此估值對外資嚟講未算便宜，加上缺乏增長嘅「低估值」可能係價值陷阱，喺企業盈利明顯改善前，港股缺乏彈升動力。目前支持港股唯一主要流入資金為北水，今年以嚟累計淨買入規模達4350億元；北水成為托住港股嘅唯一希望。不過北水近日僅向少數AI主題股傾斜，騰訊(00700)及阿里巴巴(09988)等恒指權重股，均不時錄得淨流出，對指數表現自然未見幫助。即使，北水加碼流入亦未能協助港股打破悶局；反而要留意一旦北水沽貨套現，勢必再考驗港股往下方尋找支持。
麥狄文
(徐狄怡‧證監會持牌人)
