2026年9月18日
美國聯儲局3年來首次加息並預料今年內可能再調升利率，反而增強市場對聯儲局遏抑通脹嘅信心，美國10年期債息回落至5厘之下，加上國際油價亦顯著回落，美股周四強勢反彈，道指最多升474點。道指隔晚收報51778，升0.61%或316點；標指升85點或1.14%，報收7637；納指升439點或1.69%，報26418。
美國10年期債息扭轉之前8日升勢，回落7個基點，至4.934厘，30年期長債孳息跌7.6.基點，至5.287厘。聯儲局未有受到侵侵壓力，反而致力於將通脹回到目標，市場似乎幾受落。市場氣氛好轉，之前擔心AI及科技股資金成本上漲憂慮暫時放埋一邊，NVDA升2.5%，為表現最好道指成份股，DELL再破頂，可惜阿Man追唔到貨，其實自從侵侵力挺DELL之後，即係美國政府喺5月27日向Dell批出五年、97億美元合約，DELL股價節節上升，之前阿Man都有提到，目標係600至650美元，現價去到591，正穩步向目標進發。不過阿Man自己坐唔定，早兩日去返條5MA附近，其實都低過550個止賺食糊價少少，又唔夠果斷無上返車，留意有貨嘅，睇住目標價之餘，550做返個防守，短線超買有回吐亦唔出奇。
至於NBIS管理層透露，已有客戶預訂2028年一季度及二季度算力，部分訂單涉及幾萬塊GPU，公司當前需求能見度已超過24個月，較此前約18個月明顯拉長，受消息刺激，股價早段上過230樓上，好消息出貨影響下，加上NBIS現價唔算平，股價穿返220，阿Man選擇食咗先講，股價又回落至217條20MA，今晚再決定要唔要撈返，但日線圖噚日咁樣行都幾肉酸。MU個買盤擺到咁保守，當然上唔到車，暫時股價重上10日線，有貨嘅就用返條20日線做防守，無貨嘅基於現價都逼近炒作區間頂部，暫時唔追貨，等回吐再搵位上車。MRVL穩步向上，無咗兩個橙都叫有個桔，防守位略為上移至225-230，短線目標都係250。AVAV終於忍唔住喺158上咗車，望個小圓底繼續拾級而上，防守位仍然係150。GOOG龜速慢行，夜盤上到接近350，繼續等佢上埋去100MA。另外噚晚喺495買咗注MSFT，呢個位幾條移動平均線匯聚，守得到490就睇下上唔上返500樓上。留意返今晚係美股嘅四巫日，NQ轉去262612，噚晚打爆咗29600早幾日嘅區間頂，上移一級上到29800，今晚分水嶺係29750，支持29650/29550/29450/29350，上方阻力29850/29950/30050/30150。
美滙指數回落0.05%，至100.2。日本央行今日料加息0.25厘，令基準利率升至1.25厘，日本首相高市早苗稱貨幣政策由央行負責，相信採取政策會令通脹朝向2%目標。而今日日央行議息，一如預期加息0.25厘，至於個議息聲明隱含加息指引，傾向於至少每六個月加息一次，暫時未見到市場部分激進預期要每三個月加一次。咁嘅情況下，個Yen喺加息後反應唔太大，至於兩點半嘅行長植田和男記招，除非佢口吻同份聲明並不一致，否則個Yen都唔會太大變動。
昨日港股反覆靠穩，恒指低開233點，一度跌356點見24357低位，其後跌幅收窄，收市跌109點，報24604，但成交只有1855億元，反映市場態度仍審慎，不過北水已連續第9日錄得淨流入，對淡靜嘅港股總算帶嚟一點支持。至夜期時段，美股三大指數造好，市場消化聯儲局加息，夜期反彈近百點，ADR及黑期今日亦企穩24600水平之上。今早恒指裂口高開119點，升幅最多擴大至258點見24862，半日企返喺條5日線(24742)之上，報數24768。半日成交額1069.84億元，北水錄得淨流入31.92億元，已連續10日錄得淨流入。
大市昨日跌至24357近兩個月低位，剛好跌至6月至8月反彈浪段回調黃金比0.5見支持，短線反彈留意5日線24741及5月線24823為首個阻力，下一阻力為20月線24918。以6月至8月浪段計算，回調黃金比0.382剛好接近24800水平，亦接近5月線所在。至於10日線25032及100日線25114阻力更大。值得留意恒指20日線開始跌穿50日線，形成死亡交叉，港股若一直未能重返25000水平企穩，喺成交持續萎縮下，料將陰乾式向下尋找支持。短線支持為昨日低位24300-24350，下一支持為100周線約24178，而24000心理關口及6月至8月反彈浪回調黃金比0.618即23928則為短線重要支持。留意呢兩三個交易日，大市會否迅速回補今早嘅上升裂口，如裂口短期唔回補，周四低位可能見短期底，反彈可持續。相反，上升裂口迅速回補，則港股仍處於弱勢，一旦再失守5日線，料將繼續其尋底之旅。
麥狄文
(徐狄怡‧證監會持牌人)
