2026年9月9日
中東石油輸出持續受到干擾，美伊問題遲遲未能完滿解決下，布蘭特期油逼近每桶100美元大關，重燃市場對全球通脹憂慮，美股勞動節假期後周二重開，三大指數均見下跌。道指大幅低開303點後，跌幅曾擴大至692點，低見52721，收市道指挫628點或1.18%，報52786；標指一度挫0.67%，收市跌45點或0.58%，報7673；以科技股為主嘅納指最多下滑0.63%，收市跌85點或0.32%，報26421。
油價高企，石油股受追捧，OXY及CVX股價分別漲1%及0.6%。AMGN急跌一成，為表現最差道指成份股；CAT升1.1%，為漲幅最大道指成份股。QCOM宣布簽訂協議，向AMZN提供客製人工智能(AI)晶片，同時AMZN買入價值40億美元QCOM認股證，消息刺激其股價曾急升8.7%，收市升幅收窄至3.2%，但AMZN則回吐0.6%。AMZN係阿Man長期持有嘅倉底股，成本價180，未去到免本咁爽，股價企到220樓上，都無打算落車。INTC阿Man亦係長線睇好，可惜之前96買嘅短炒貨一個唔覺意95止咗，完全錯過今次呢10蚊升幅；公司據報計劃於10月上旬，再度上調中央處理器(CPU)售價，加幅或達10%，股價逆市勁升9.1%。NVIDIA回落2%，係表現最差嘅「科技七雄」，其實回返啲去210，阿Man反而想加碼買返啲，NVDA嘅業績若然一直交到數，現價其實仲係平。至於MU、DELL、CRWV同MRVL，短炒都無晒貨；反正呢個星期出CPI同PPI，唔差在等多兩日，若然有乜嘢震盪，可能會有平貨執。至於NQ今晚分水嶺喺29550，支持29450/29350/29250-29200，上方阻力29650/29750/29850-29900，同噚晚一樣無變。
港股昨日繼續窄幅偏軟，恒指低開161點後，一度跌187點至25225低位，其後收市跌95點，報收25317，成交繼續淡靜，只有2061億元。由於油價持續高企，布蘭特期油直撲每桶100美元大關，恐加劇全球通脹，美股勞動節假期後表現偏軟，拖累美股三大指數下跌，今早黑期亦隨美股走軟，回落至25300水平之下。不過恒指高開10點或0.04%，報25328，唔算開得太低，淡友見25300企唔穩就發動攻勢，大市即向下最多跌155點，見25161，一度跌穿100日線，內地公布8月CPI數據後喘穩，條50MA同100MA守住又死唔去，半日曾倒升18點，高見25335，半日收報25316點，跌不足1點。大市半日成交1073.16億元，北水淨流入31.4億元，仍然靜過鬼。
雖然港股暫時仍處於區間上落，下方於24950至25000關有一定支持，因此關為20個月平均線所在，但50日線已逐步上移至25100水平，而100日線目前於25200水平，一旦此兩移動平均線失守，25000關岌岌可危，並非窂不可破。而本周美國將公布重量級通脹數據，以及下周美國FOMC議息，若然數據顯示通脹威脅重臨，聯儲局釋出較鷹訊號，將加大環球股市下調壓力。而油價高居不下，對通脹構成更大威脅，若然內地經濟情況未見改善，則港股跌破25000機會似乎較向上突破26000機會更大。至於短線恒指又再重返全部日線移動平均線之下，如恒指遲遲未能收復20日線企穩25500水平，走勢將進一步偏軟，目前25500-25600水平，已由支持變成阻力，而上方250日線即25764阻力更大。目前似乎係炒股唔炒市勝算更好，搵有實力嘅個股收集，但盡量避開指數重磅股。
麥狄文
(徐狄怡‧證監會持牌人)
