2026年9月8日
美股噚晩假期休市，市場仍關注美債息及利率去向，不過今早納指期貨造好，不少AI產業鏈股份再受追捧。本周美國除公布重要通脹數據，數據將對FOMC下周議息極為重要之外；美國財政部本周三擬公布將於次日進行債券回購計劃細節，規模至少係原定計劃兩倍，甚至有可能達到原計劃三到五倍，回購計劃決定將直接影響長債息走勢。
雖然美股噚晚無市，但今早見夜盤好多AI產業鏈股再落鑊，其他先唔講，就講返阿Man之前短炒倉嗰幾隻，CRWV企好咗10MA個85美元，家下再去埋20MA，上咗91，阿Man就肯定得個睇字，上周已出清啲短炒貨，本周有重磅通脹數據，加上下周FOMC議息，無信心高追，反而睇緊95-98呢啲位，會唔會又係阻力返轉頭。DELL有貨嘅不妨將個止賺價推高啲去490-495，睇下係咪再創新高。MRVL可以等佢彈上去補一補裂口228至240，留意下呢度有冇阻力。至於MU繼續向住個range頂1080推進，有貨嘅可以將個止賺推上去980至1000，再等下有冇去埋range頂。至於NVDA上到230附近，企返幾條MA，短炒就用210-215做防守，若然有呢個位，或者阿Man都想加一加注。NQ今晚個分水嶺喺29550，隨時阻力29650/29750/29850-29900，至於下方支持喺29450/29350/29250-29200。
港股本周開局出師不利，恒生指數甫開即反覆向下，盤中一度跌287點，低見25362，一口氣跌穿10日線(現25480、期25405)及20日(現25503，期25449)，收市跌237點，報25413，成交額2096億，北水重新錄得淨流入，但只有12.75億元。雖然中國財政部向多家內銀內銀集體注資，但內銀股及內險股偏軟，資金流向部份AI產業鏈相關股份。至夜期時段延續弱勢，在美股假期休市下，夜期幾乎由頭跌至尾，進一步跌穿5日線(現25384，期25326)，報收25254，今早黑期則於25300水平徘徊，料今早港股低開。結果今早恒指低開161點，報25252，跌幅隨後擴大至最多187點，低見25225點，又係守到條100日線(25210)反彈，大市跌幅收窄至少於100點，恒指半日收報25345，去返條5日線附近徘徊，半日跌67點或0.27%。大市半日成交1049.84億元，北水淨流入32.29億元，似乎買貨鬆手咗。
內地銀行獲大規模注資，對資本充足率實質利好，但注資改善嘅係核心一級資本，並非信用需求，特別國債本定為約3000億元人民幣級別，最後實際集資只有約2500億元人民幣，第二輪注資低過預期。目前中美國債息差約3厘，人民幣政策偏強，預期借貸需求相對弱，對銀行嚟講實際上並非好事。昨日呢堆股先升後跌，今日續偏軟，國壽(02628)跌1.3%，報30.16元；中行(03988)跌1%，報5.885元；農行(01288)跌1.4%，報6.29元。美股嗰邊啲AI基建股再受追捧，令港股備受冷落，再次進入捱打狀態。
雖然港股暫時仍處於上落市格局，一直於幾條移動平均線之間上落，但今日或再度下試100日線(現25215，期25166)，甚至50日線(現25060，期25082)尋找支持。目前恒生指數日線保力加通道底部處於25127，剛好為50日線及100日線附近，一旦跌穿25000重要支持，料港股或向下突破，考驗24800/24500支持。留意本周美國將公布重要通脹數據CPI及PPI，對下周聯儲局議息有重大影響，暫時資金仍然審慎，或待FOMC議息結果公布後再作部署。
麥狄文
(徐狄怡‧證監會持牌人)
