2026年9月2日
9月份首個交易日，美股出師不利，道指低開102點後，跌幅擴大至最多494點，低見52691，收市道指跌419點或0.79%，報52766；標指跌54點或0.71%，報7631；納指跌271點或1.03%，報26099；往績顯示，9月通常係美股全年最弱嘅月份。
重磅股中，Nvidia、亞馬遜及Tesla分別挫1.5%、1.9%和3.2%。半導體股沽壓大，高通、美光科技及應用材料跌幅介乎2.3%至3.6%。MU噚晚一度跌穿條20MA，本身擺咗喺920止賺，今早見美股夜盤穿咗930，決定929落咗車先，條50MA企唔到，仲要擔心20MA守唔穩，都係食咗先講。始終啲債息咁高，資金避險情緒高漲，短炒都要睇緊少少。MRVL兩注均價215，盤中跌到200邊，差少少就想打靶唔留貨，不過一齊炒美股嘅成班戰友，都喺200-205上車，股價落到range底，買多一注203博一博，不過盤後都係企唔到210，三注平均價拉到211，同樣用個200做防守，保佢大今晚最好上返220樓上，企唔穩都搵位落車。
DELL先畀佢嚇親，本來兩個買盤喺435同445，手多多改咗去450同440，連環中晒兩注，盤中430又接多注，三注均價440，用返個420止防守止蝕，419擺埋個止盤大覺瞓，好彩業績公布好過預期，股價盤後一枝箭上返460樓上，嗱嗱聲喺460減返一注，手上兩注唔理咁多，拽定個450止賺算數，唔想由贏變輸，今晚行得好嘅就博佢上返480-500，相反高開低走。450止賺先無壞。CRWV最終決定唔加注，86一注未打靶，行完個神奇九轉都未反彈，79擺返個止蝕盤，如果止埋無眼睇佢。GOOG個320買盤未中，暫時由佢擺下先。NQ繼續調整，暫時29000危危乎，今晚分水嶺29100，支持29000穿就向下玩落去28900/28800/28700，上面反彈阻力29200/29300/29400。
美國10年期債息最多曾揚4.61個基點，至4.7961厘，30年期長債孳息漲4.34個基點，至5.2857厘。同時，日本10年期債息自1996年以來首次升穿3厘，英國30年期長債孳息亦攀至1998年以來新高。環保債息高企，掉期市場顯示，聯儲局本月加息0.25厘機會接近70%。
環球債息上升觸發股市被拋售，加上美國與伊朗再度互相開火，而上周聯儲局主席沃爺又放鷹，幾面夾擊下，令本來上月已跑輸環球股市嘅港股走勢進一步轉弱。噚晚夜期隨美股三大指數下挫而走軟，一度低見25117，收市報25176，今早黑期亦跌穿25300水平，結果恒指今早低開失守100日線，半日跌242點，報收25087。暫時二萬五關守住，但反彈條100日線(25225)或由支持變阻力， 100日線若未能盡快收復，下試條50日線(24913)係遲早問題。值得留意恒指喺7月份時，24800-25000有個橫行平台，一旦失守平台底部24800，向下考驗24500/24200/24000機會大增。現階段盡量避開啲指數權重股，搵返啲安全邊際較高嘅股份收集勝算應較高。
順豐同城現價配置安全邊際高
規模效應與AI賦能下，內地最大第三方即時配送平台順豐同城(09699)交出亮麗成績表，大幅突破行業盈利天花板。公司剛公布2026年中期業績，實現總收入117.4億元(人民幣‧下同)，不僅再刷中期業績紀錄，按年增速為14.7%。旗下同城配送服務訂單量同比增長超30%。毛利達8.23億元，順豐同城應佔淨利潤達3.49億元，同比大幅勁增 154.9%，延續其過往連續7個財報所展示高速增長盈利能力，增速持續超過1倍。
有別於市場目前憂慮投入AI相關股份因資金研發大增，或構成集資壓力，順豐同城持有現金及現金等價物及短期理財投資達 24.54億元，資產負債表極其穩健。而伴隨網絡密度提升、AI技術在前端獲客至後台管理嘅全鏈條深度融合，以及精益化騎手底盤運營，順豐同城規模效應持續擴大。隨着監管推動外賣及即時零售行業回歸「公平競爭」、消除「拼補貼/控流量」現象，公司「食正」商家重奪話事權，可助力商家，承接全渠道即配紅利。順豐同城今次份中期業績再次印證公司商業模式具備成長可持續性，並成功突破「增量增收與增利不可兼得」嘅行業痛點。
面向商家(To B)同城配送收入達57.22億元，按年增長28.1%，深入商家經營生態，年活躍商家規模增長44%，與各大頭部客戶合作收入快速增長。至於面向消費者(To C)高端服務與「小時達」快速滲透，最後一公里網絡協同釋放生態價值，To C業務收入達14.67億元，按年增長11.8%。除咗同城即配業務上，公司與順豐集團打造「倉儲+轉運+同城即配」經濟網絡承接，上半年共同服務月結客戶帶來外部增量收入2.63億元，按年增26.4%。公司最後一公里業務收入達45.51億元，此業務喺618等大促高峰期亦發揮彈性運力削峰填谷作用，同時成功向非順豐集團客戶擴展，滿足呢類最後一公里客戶對冷鏈、大件及四輪配送等定制化運力的多元化需求，業務後續增長新動能明顯。
順豐同城率先對接主流AI Agent，解鎖「一句話下單」新流量入口，完成與微信「小微」、支付寶「阿寶」等主流 AI Agent對接，實現用語音或AI指令直接調用順豐同城即配履約。順豐同城已成功搶佔科技高地，成為AI生態中可被直接調用的獨立第三方同城即時配送基礎設施。內部亦全面推動履約、調度、客服三大AI智能體落地，大幅拉升組織與前端運營效能。隨着無人車規模化以及公司創新無人車「共享運力」服務商業化落地，可望進一步提升無人車車輛使用率並拉低單位營運成本，繼而令無人車網絡與其騎手運力有着更佳的優勢互補。
睇返順豐同城現價，估值處於顯著歷史低位，盈利確定性極高。以昨日股價對應市銷率計算，順豐同城僅約0.28倍，遠低於同業美團(03690)約1.09倍及行業平均水平。順豐同城所持續展示嘅可持續收入及盈利能力成長故事，現階段配置安全邊際極高，極具估值追落後與迎接績後成長確定性強化嘅上望空間。
麥狄文
(徐狄怡‧證監會持牌人)
