2026年8月28日
噚晚美股三大指數都升，全靠NVDA派完成績表股價造好帶動，加上啲數據又未反映聯儲局要急住加息，美股仍然高位徘徊。道指高開149點，隨後反覆上落，一度抽高243點，高見53707，收市升105點或0.2%，報53569；標指升55點或0.72%，報7730；納指升411點或1.57%，報26541。重磅股中，Tesla股價收市升2.6%，微軟升1.7%，亞馬遜則跌1.5%。Salesforce上調全年業績預測並宣布與人工智能(AI)初創Anthropic加強合作，股價炒高22.6%，為升幅最大道指成份股。與AI基建相關的晶片股造好，英特爾升約4.4%。Nvidia業績理想，加上釋除市場有關循環融資憂慮，股價急升8.7%，市值單日增加4420億美元，帶動大部份科技股上升。
噚日阿Man打敗仗，瞓足一日，日市期指完全無操作，反而到美股時段返啲精神做下嘢。MU將900個買盤一分為二，一個擺908，另一個擺898，今朝瞓醒就見接咗貨908一注，暫時等下898個買盤中唔中，都係用返個880做防守，博MU仲喺880-980呢個range炒上落。MRVL果然上到250樓上，美股開市後見到達目標，250順利食糊，然後又擺反個210同220買盤，準備喺20MA同100MA又補返貨。DELL成功收復10MA，順手將個止賺位推高去450，20MA依家喺455，守到又睇返前頂500-515左右。CRWV喺82嘅買盤未買到，86嘅貨繼續持有，防守80望住先。NVDA業績後急升，但阿Man短炒貨早於業績前210止賺咗，執少十幾蚊，不過本身有貨底，股價升咗倉位都水漲船高，一樣咁開心。NQ玩嚟玩去仲喺29000至30000呢一千點裏面，噚晚上到29700行人止步，但又唔見回得多，今晚分水嶺29600，支持29500/29400/29300，上方阻力29700/29800/29900。
美國10年期債息一度抽高2.38基點，報4.6703厘，30年期長債孳息升2.6基點至5.1931厘。美國通脹持續高於聯儲局2%目標，堪薩斯聯儲銀行總裁Jeffrey Schmid於彭博電視訪問中指出，當前聯儲局政策仍未處於收緊性區間，但將自己歸類為支持加息一派。芝加哥聯儲銀行總裁Austan Goolsbee則於其博客中表示，決策官員必須注視關稅及其他物價衝擊影響是否具持久性，但同時認為未來3個月通脹前景似乎唔太差。投資者注視美國聯儲局主席沃爺周五將於Jackson Hole全球央行年會發表演說，能否為未來息口路徑提供更多訊資。美滙指數曾升0.1%，報99.26，日圓最多挫0.14%，報159.53兌每美元。
至於港股近幾個交易日均以窄幅上落終結，昨日恒指高開121點後，全日悶局一場，雖然盤中一度高見25792高位，可惜受制250日線(25761)，其後20日線(25639)及5日線(25651)得而復失，最終報收25565，險守10日線(25550)，全日成交額只有2335億元，買賣兩閒。今日為期指結算日，料早段港股難有大突破，若今日港股維持本周窄幅上落節奏，恒指困於25400-25800區間之內，則本周將為繼7月中以來，周波幅最窄一周。雖然美股噚晚上升，但夜期跟ADR就無啦啦隊過百點，今早恒指低開155點，報25410，又係呢個星期個range 底25400守住就反彈，大市收復失地並倒升，早市尾段最多升133點，高見25699，並接近半日高位收市。恒指中午收報25684，升119點或0.47%，重越10日線(25606)及20日線(25629)，只欠一步就收復埋250日線(25764)。不過半日成交額只有1174.98億元，北水繼續流入20.96億元。
目前恒指於26000-26200見明顯阻力，至於下方25000-25200則有一定支持，暫時港股缺乏催化劑推動，而今日收市後美團(03690)將公布業績，而美團股價已連跌三個星期，昨日更跌穿80元心理關口，未知有否春江鴨於業績公布前先作部署。回顧多隻重磅股公布業績後，股價均見光死，美團會否有樣學樣尚未知。一旦美團業績後又見光死，或進一步影響大市氣氛，拖累指數表現，今日收市後將揭盅。不過，美團績前插水咁多，而市場亦早有準備佢份業績都唔係勁，反而業績出嚟唔係太差，或市場相信美團已能走出谷底，即有望藉此帶動其他平台股回升。短線恒生指數初步支持仍為25200即100日線所在，亦接近日線保力加通道底部25180；而25000心理關口則為下一支持，較重要支持為50日線約24800水平；而250日線即25800水平遲遲未能企穩，上方26000-26200阻力更大，暫時大市仍困於千點區間內上落，或要待下周方有較明確方向。
麥狄文
(徐狄怡‧證監會持牌人)
