今日 13:50
美國財長貝桑擴大長年期國債回購、主動管理債券供應以壓低融資成本，此舉引發市場擔憂，布魯金斯學會資深研究員布魯克斯形容貝桑「玩火」，警告美國或重演日本式貨幣貶值。另外特朗普表示，佢未有指示貝桑干預債市，又稱經濟增長將自行化解超過40萬億美元國家債務問題。美銀策略師哈特內特指出，若財政部擴大國債回購未能將30年期利率壓低至5厘以下，則11月中期選舉前美元恐承壓，且超大規模雲端商、私募信貸及金融股等風險資產將面臨沽空壓力。
債息高企推動黃金向上，現貨金周五升穿4600美元創三個月高，漲幅達2.5%。高盛分析員表示，黃金認購期權需求激增，加大金價劇烈波動風險。對沖基金橋水創辦人達里奧表示，投資者應考慮減持債券，並將最多15%資金配置於黃金，以對沖美國債務危機風險。不過，美債息攀升憂慮暫歇，道指周五曾彈596點，收市仍升517點或0.98%，報53277；標指升33點或0.43%，報收7674；納指反彈113點或0.43%，報收26180。
重磅股方面Tesla抽升5.1%，Nvidia回吐1%，蘋果跌0.6%，大摩及高盛分別揚3.3%及3.7%。MU推止賺去960呢個策略唔錯，食咗先講，今早見夜盤落返去940，逼近條10MA，今晚再睇睇搵唔搵位上返車，理想係落到900-920再上返車。DELL喺428買嘅貨，用420止蝕仍然健在。至於MRVL周五晚又企唔穩250，先喺248減返一半，留返217嗰一注，而207嘅GTC買盤無郁過，接近20MA都會補返食咗糊嗰一注。ALAB用個278睇住做防守，見個價一路上唔到300樓上，擺返個買入價283買入價做止蝕盤，結果星期五晚就畀佢KO咗，暫時ALAB都係未夠底氣，可能仲要觀察一下。NBIS撈返215嘅一注，不幸又hit咗個210止蝕盤，睇個款可能要補返個裂口，今晚再睇下係咪要落到196-200邊。INTC就90走咗先算，第二次再落90，都係走咗先算。至於NVDA本周公布業績，210止賺盤無hit到，睇多兩日短炒嘅貨再諗下博唔博業績。NQ分水嶺29300，支持29200，都係繼續睇位29200呢個支持位，至於上方企唔返29500就比較弱。今晚先睇係咪窄幅整固住先29200-29500。
港股上周四以裂口高開，升穿5日、10日及20日線，周五再升310點至26009全周高位收市，恒指一周累計升893點。值得留意上周五恒指服務公司公布季檢結果，成分股將由93隻增至95隻。加入華虹宏力(01347)及濰柴動力(02338)，結果未有令市場意外；反而恒生綜合指數成份股由534隻大幅增至580隻，增加多達46隻成份股，而呢批股份亦會成為港股通名單候選股，或吸引北水買貨。
不過，阿里巴巴(09988)周日忽然宣布配股，以配售價為每股112.7元配售7.1億股，較上周五港股收市價123元折讓約8.4%，配售總金額約800億元，所得款項淨額將100%用於投資全端AI能力，加強AI基礎建設，進一步鞏固阿里在AI領域的全球領先地位。配售已獲超額認購，長線投資者及主權基金積極參與；由於市場反應熱烈，配售集資額才上調至800億元。阿里美國預託證券(ADR)上周五(21日)插水近9%，擺明有春江鴨收到風。
今早恒指低開229點，報25780，已為半日高位所在，阿里巴巴喺開市後，迅即跌穿配股價，拖累恒指最多跌578點，低見25430點。半日跌544點或2.09%，報收25465，接近半日低位。國指跌173點或2.01%，報8460；科指跌183點或3.84%，報4582。大市半日成交1679.06億元，北水淨流入55.88億元，雖然大市跌咗超過500點，但成交方面又未見顯著放量，但阿里配股確係打擊市場氣氛，主要係市場擔心其他科技股有樣學樣，對指數構成定壓力。暫時恒指一口氣跌穿返10日、20日及250日線，上周走勢正好轉嘅港股，又回復弱勢。此外，本周三美國將公布重要通脹數據PCE，同日收市後Nvidia公布業績及本周三至五為Jackson Hole全球央行年會，相關公布及消息均會左右環球股市表現。
麥狄文
(徐狄怡‧證監會持牌人)
