2026年8月13日
美國剛公布7月份核心通脹溫和，有助緩解聯儲局9月加息壓力，美股周三個別發展，道指輕微高開5點後，升幅一度擴大至177點，高見53969，資金重新追入AI算力、半導體及光通信等新科技股。美股三大指數個別發展，道指反覆偏軟，收市報53770，轉跌21點；標指升20點或0.26%，報7748；納指回升143點或0.54%，報26588。
NBIS阿Man博中個業績，可惜嘅係捉到鹿只係脫到一半角，190元上返車嘅貨，其中一半走得太早，207趕住投胎咁落咗車，幸好仲有一半坐定定，開市一路爆上，見上得返50MA放心坐定定，暫時就推止賺去250，睇下呢個板塊係咪再展升浪。DELL只係中返半注435，叫做好過無，425買盤影都無，見開盤無耐就扶搖直上，話咁快破埋個頂，穿頂就唔估頂，呢次望佢可以突破到500大關，暫時用返個470做防守，想食得盡少少。INTC中返96嘅貨，90做防守都無乜威脅，其實INTC相對仲係幾落後，望佢企返上條50MA，有冇機會去返120樓上補返個裂口。
MU一直係阿Man嘅愛股，噚日盤前見啲資金似流返入去啲AI算力同半導體股，而MU又上返880條20MA，唔埋三七廿一，喺900追返入，暫時用返個880做防守，博佢翻生上返去10周線同50日線，即係960左右。不過針無兩頭利，老登股就有啲腳軟，MSFT個防守推到490，盤後自動止賺咗，呢一波嘅短炒，利潤有成嚿水，已經好滿意，至少長線坐住嘅免本貨，當然係緊緊抱住唔放手。至於NVDA短炒貨繼續持有，只要企穩條10MA，都唔急落車住。NQ今晚分水嶺喺29900，阻力30000/30100/30200/30300，支持29800/29700/29600/29500，29500條10MA同50MA守得穩，又扭返轉之前個弱勢。
美國7月份消費物價指數(CPI)按年升幅從6月的3.5%，放慢至3.4%，與市場估算一致，按月轉升0.1%，符合預期。通脹數據公布後，美國10年期債息一度回落5.5個基點，至4.6334厘，其後靠穩；對息口較敏感嘅2年期債息曾降5.24個基點，至4.1614厘，交易員繼續押注聯儲局9月約50%機會加息；10月加息概率則由周二約75%，回落至約60%。Northlight資產管理的投資總監Chris Zaccarelli表示，今次通脹報告最大驚喜係通脹未見提速，加上最近公布新職位增長疲弱，兩個數據令聯儲局buy time等個通脹回，短期唔急於加息。聯儲局下月15至16日舉行議息會議前，官員尚會收到多一份就業報告及一份通脹報告，市場將按呢啲數據去推算之後嘅息口路徑。美滙指數一度轉漲0.19%，至100.02，日圓曾揚0.45%，至158.58兌每美元，其後回軟。
港股連續第二日下跌，恒指繼周二失守二萬六關再顯著跌穿10日線及250日線後，昨日裂口低開低走，全日跌212點，報收25440，略為跌穿20日線，成交額2167，北水連續第二日錄得淨流出。雖然噚晚美國公布7月份核心通張溫和，大大緩解9月聯儲局加息壓力，美股科技股表現不俗，但反令資金從中概股念出，夜期及ADR先反彈後回復跌勢，資金再次出現pair trade狀況，即新科技股強刼2時，老登股又遭唾棄。而騰訊(00700)昨日公布第二季度業績，即使其業績表現合符預期，但資本開支暴增導致自由現金流轉負，拖累ADR股價較昨日收市價顯著下跌約4%。而近日內地企業面臨美國監管及針對，亦成為資金拋售港股重磅科企及中概股藉口。
今早恒指於黑期亞洲時段重返25300水平，恒指低開152點，咁就做咗25288低位後即反彈，竟然完全無落去考驗下條100日線，皆因25300啱啱係條5周線，只不過今日收市若然都係受制條20日線即係企唔返25500水平，短線穿返條5周線去考驗條100日線嘅機會仍大，畢竟恒指已連續兩日收市上唔返條250日線。不過估計25000呢個心理關口，即期指之5月線及20周線附近，點都會有支持，加上恒指落到25000左右，剛好周波幅已足1000點，波幅需求滿足下，或有短線彈。反彈阻力方面，首個阻力為20日線約25500水平，亦為昨日成交密集區頂部，下一阻力為10日線約25720，及8月10日上升裂口頂部，如短線無法重返20日線及10日線企穩，恐怕後市調整持續，甚至回復跌勢，如100日線再度失守，下一支持料為50日線即24600水平，亦為好友最後一度防線。
麥狄文
(徐狄怡‧證監會持牌人)
下一篇：炒股讀心丨流動資金地圖
