2026年8月10日

盤房來料丨恒指250日線失而復得未轉弱

美股上周大升，道指一周累計上升3%，標指升3.6%，納指則大幅反彈5.2%，費城半導體指數更急升近一成。道指與標指上周五亦創下歷史新高。展望本周，美國將於周三(12日)公布7月消費物價指數(CPI)，周四公布生產物價指數(PPI)，呢兩個反映通脹嘅數據將直接影響聯儲局9月減息路徑。據英國《金融時報》較早時引述消息指出，如果未來數周嘅通脹數據熾熱，或者市場加息預期升溫，聯儲局主席沃爺將準備調高利率。不過美國上月就業數據較預期疲弱，若通脹數據亦釋出持續放緩跡象，將有助確立加息降溫預期，帶動美股再走高。但油價高企仍然係其中一個重要變數，若然今次公布嘅CPI反彈並高於預期，預計美股或出現震盪。

雖然美股上星期表現唔錯，不過阿Man已經預咗個短炒倉要睇得緊，MSFT守住480；NVDA守住210，仍然持有。但係MU暫時未返個range底，而range頂企唔到，擺住喺watch list，觀察吓先。至於GOOG，防守位340無穿，再推返高少少個防守位去350再等等。DELL上周趁回踩喺433上返車，425個防守盤中曾跌穿，但秒速上返20MA，既然守到20MA，當然係留住無落車。NBIS就187元止蝕咗，星期五無再上返車，今晚再睇下乜嘢走勢先決定再買唔買返。NQ又玩返高一級，今晚分水嶺29800，支持29700/29600/29500，上方阻力29900/30000/30100。

呢個星期除咗美國公布重要經濟數據之外，港股呢邊唔少重指數權重股公布業績，包括騰訊(00700)及京東(09618)，而AI焦點股中芯(00981)及華虹(01347)亦於本周派成績表。新股方面，宇樹科技展開IPO認購申請。另一個市場關注嘅科技巨頭會面係LG集團董事長與Nvidai行政總裁黃仁勳，預計喺Nvidia位於美國矽谷總部會面，據南韓媒體日前報道，二人或討論實體AI、智能工廠，以及LG採購輝達Blackwell GPU細節。

至於港股連升五個星期後，上周出現回吐，按周計回落216點，周五報收25668。恒指自6月26日於22618觸底，反覆升至上周二高位26187點，累計升3569點掉頭，並創下有紀錄以來7月份最大升幅。雖然恒指已連續兩日收於5日線25795、10日線25705及250日線25733之下，但10日線及20日線持續向上，已升穿50日線，形成黃金交叉。另一方面，周五夜期時段大市再度回升，逼近25800水平，今早黑期亦於此水平徘徊。今早恒指高開137點，報25805，開市已重越250日線及10日線，其後升幅曾收窄至52點，見25720低位，剛好接近250日線見支持。大市發力再上，升幅最多擴大至231點，高見25899；其後主要於25800水平徘徊。恒指半日升185點或0.72%，報25853；大市半日成交1407.99億元，北水淨流入38.85億元。

恒指成功重越10日線及250日線，並以裂口高開，而半日未見回調回補裂口，反映港股市底仍偏強強。目前大市正於高位整固，恒指只要一直守於100日線及20日線之上，仍可視作回升後整固。留意短線好淡分水嶺為25500，跌穿則有機會考驗20日線、100日線，約為25150-25250水平，至於反彈阻力為26000心理關口及上周高位26200-26300水平。

麥狄文

(徐狄怡‧證監會持牌人)