2026年8月7日
美伊局勢反覆，有伊朗議會成員透露，草議有關管理霍爾木茲海峽管理方案，可能禁止美國及以色列等敵國通過海峽，國際油價及美國債息回升，美股破頂後動力減弱，噚晚又借消息回吐。另一方面，英國《金融時報》引述熟悉聯儲局主席沃爺想法嘅人士指出，如果未來數周通脹數據熾熱，或透過加息為通脹降溫。道指高開77點後，升幅曾擴至153點，但未幾耐即轉跌，一度挫514點，低見53835，收市道指跌464點或0.85%，報53885；標指反覆跌13點或0.18%，報7709；納指回吐15點或0.06%，報26348。
微軟股價收市升2.5%，MSFT嘅短炒貨企咗幾條移動平均線，守到480呢個短線支持位，就繼續持有先。而NVDA反覆回吐0.1%，仲企到喺210樓上，一樣唔搞佢持有先。至於MU盤前中返870嘅短炒，用個850做防守，再喺860接多手，均價865，擺返個855止蝕，結果一嘢止蝕咗。開市後820都無影，均價833又上返車，博MU都係炒range，彈返個880-920畀我食返個range都好，最終喺884均價落車，有驚無險，都係唔留貨過夜，繼續擺盤喺800個range底同900個range頂，呢一舊水炒住上落先；Alphabet跌1.3%，彭博引述消息指出，該公司計劃發債最多250億美元。361多手狗衝嘅GOOG，用340做防守，未到止蝕位，再睇多日。
DELL喺463中咗半注，457盤前加咗注，均價460，穿防守450，448打靶，佢夠死落返去10MA同20MA附近做回踩，上返433上返車，博佢回踩完再上過，暫時用返個425做防守先，睇住條10MA嚟決定去留，今晚先再搞掂佢。至於NBIS就瀨咗嘢，212同208上到車，但199盤中又被處決咗，盤中落到100日線188附近做回踩，190上返車，暫時見盤後上返190樓上，擺定個187止蝕算數，100日線穿都係斬咗先講。SpaceX即將迎來首批解禁股份，股價周三急插水逾13%後，周四反彈6.1%，市場正開始消化呢個短線利淡消息。NQ噚晚喺個分水嶺上下窄幅上落，阿Man食花生無落過場，今晚分水嶺無變仲係29500，支持29400/29300/29200，阻力29600/29700-29800，留意今晚公布非農數據，即係個NQ喺數據公布時可能已有異動。
港股昨日回軟，恒指低開248點見25667，甫開市已跌穿250日線25730，開市價已為全日高位，盤中一度跌526點見25389，最終跌幅收窄至385點，報收25530，全日成交額2552.26億元。恒指以全陰燭收盤，並一口氣跌穿5日、10日及250日線，遺下25667至25729下跌裂口，幸而未見跌市成交顯著放量。上周已多次提示，港股至26000水平已有見頂之嫌，剛好昨日傳出內地稅務部門已開始對境外保單收益徵數20%個人所得稅，拖累金融股顯著下跌，尤其本地保險股，其中友邦(01299)大跌近6%，拖累恒指顯著回調。今早恒指低開3點，報25526後再腳軟，跌幅最多擴大至137點，低見25393點，不過噚日嘅低位25400水平守得住，加上A股精神，港股亦逐步收復失地，完半場前止跌回升。恒指中午收報25567，升37點或0.15%。大市半日成交1411.85億元，北水淨流出7.49億元。雖然北水係有少少淨流出，但睇成交個市都係無太大動靜，資金係無積極買貨，但同樣持貨者亦耐心等候，未見急住落車。
港股於7月份累計升逾3000點，但由25000升至26000水平，未見資金放量，缺乏增量資金下，僅以板塊輪動支撐大市，並於26000水平乏力向上。噚日跌穿咗10日線同250日線，如兩三個交易日內，恒指未能重返250日線即25700水平之上企穩，短線有機會進一步下試20日線及100日線水平，兩線分別於25250及25150水平。不過料25200-25300初步有支持，因此水平早前曾形成一個成交密集區，今日即市則留意25400-25500昨日所形成之密集區能否企穩，企穩或有機會反彈，不過昨日下跌裂口25650-25700或成短線阻力，短線大市或再於數條移動平均線之上落，即25200-25800水平之間，如仍守於多條平均線之上，則視作急升後回調整固，如重返20日線之下，並失守100日線及25000水平，則有機會展開另一個跌浪。
麥狄文
(徐狄怡‧證監會持牌人)
