昨日 13:27
中東局勢再度緊張，特朗普表示，佢對伊朗失去信心，因為對方講大話，華盛頓希望贏得這場戰爭，美軍未來數周將繼續重創伊朗。伊朗「波斯灣海峽管理局」發聲明稱，由於美軍喺相關海域持續採取侵略性行動，目前霍爾木茲海峽已無法正常通行。
不過，市場漸漸對美伊戰爭無乜反應，美股上周五反彈。道指一度跌211點後曾倒升415點，收市反彈276點或0.53%，報52485；標指反彈52點或0.7%，報收7489；納指反彈251點或1%，報收25373。對沖基金Citadel從出現問題嘅同業大手接貨，紓緩市場對AI股份被拋售的擔憂，費城半導體指數一度彈5.16%，但收市打回原形升幅無晒；美光倒跌5.9%，SK海力士回落3.5%，Nvidia則升2.9%。蘋果公司業績後股價曾跌一成，收市仍挫7.4%，但亞馬遜急漲逾15%，支持美股周五反彈。
至今早喺亞洲時段，早段日、韓兩股市又插水，但至中午見反彈，納指期貨亦彈返上28600水平，NQ較上周五收市價彈返唔少。上周五阿Man完全無炒過美股，主要係觀察住先。NVDA嘅短炒倉仍然喺手，見股價上返200美元，睇下今日企唔企得穩200。至於另一隻未落車嘅短炒貨MSFT穩步向上，已經企返條250MA，暫時用返440做個止賺位，企到喺448條250MA上面繼續持有。觀察名單除咗MU，會睇埋NBIS，MU暫時支持係780-800，下一支持730-750，反彈阻力860-880，下一阻力係900-920。至於NBIS下面支持睇住個170同150，上面阻力仍然係200-220。短線可以考慮喺呢啲位炒住上落先。AMZN出完業績勁升，破咗52周高位，就讓子彈再飛，短線支持睇住240-250，回踩唔穿240可以搵位上車短炒。至於NQ今晚分水嶺28600，支持28500/28400/28300/28200，阻力28700/28800/28900/29000。個NQ一直唔上返29000企穩，都視為跌浪中嘅反彈，呢個亦係阿Man點解短炒倉仍然高現金比嘅原因。
港股於7月最後一個星期持續上升，恒指連升五個交易日，上周上以24938點起步，至周四最高見25971接近兩個月高位後升勢回順，至周五報收25884，按周再升921點或3.68%。恒指於7月錄得3003點升幅，係自去年2月以嚟最大單月升幅，繼五窮六絕後，成功七翻身。恒指技術走勢明顯走強，50日線(24590)暫成短線支持，而5、10、20、50日更順勢由上而下排列，10日及20日線升穿50日線，出現黃金交叉利好訊息。雖然技術走勢上，港股仍處於由6月底延伸至今嘅上升通道上，但上周升勢則伴隨市寛背馳，呢個係短線港股於升勢中略作回調遇阻力抖抖氣，抑或已接近頂部見頂回落，仍有待觀察。踏入8月業績期，隨續有重磅股派成績表，本周二率先迎來滙控(00005)業績，而本周美國嘅就業數據及PMI數據，將成為聯儲局9月議息參考。現價恒指上下1000點內牛熊證街貨比例為2:8，牛熊證街貨仍失衡，短期成為恒指再挾上誘因。
半日恒指高開102點，阿里巴巴(09988)表現出色，連同其他科網股帶動下，大市一度升穿26000關口，最多升249點，高見26133。不過26100未能企穩即掉頭，早段一度倒跌最多跌72點，低見25811後喘穩。暫時恒指叫守住5日線，繼續喺26000關前角力。恒指半日收報25895點，升11點；國指升10點或0.13%，報8622；科指升35點或0.74%，報4864。留意大市半日成交額只有1426.99億元，但北水再度得流入44.75億元。
自從港股升至25000水平後，未見有大量資金湧入，資金仍然只係板塊輪動，市寛持續出現背馳，資金於現水平顯得審慎，高追有一定風險。留意恒指短線於26150及26350仍有一定阻力，26500水平阻力更大。至於下方首個支持為25750-25800，約5日線水平，下一支持為25450約10日線水平，重要支持為25150約100日線水平；睇好後市再升展浪嘅，可以回踩100日線，喺25000-25200搵位上車，用返20日線做防守，如港股後市仍要維持升勢，調整要守20日線，即24800水平不容再失。
麥狄文
(徐狄怡‧證監會持牌人)
