2026年7月20日
上周五美股晶片股先跌後回穩；其中SK海力士ADR一度滑落4.4%，低見145.57美元，首次跌破美國IPO發行價149美元，但低位有反彈近一成至167.37美元；收報154.03美元仍彈1.1%。蘋果公司周五超Nvidia，成為全球市值最高公司。投資者重新評估AI前景之際，科技巨頭的市值排名亦再洗牌。另外《紐約時報》報道，Meta洽談向Anthropic出租算力，未來兩年潛在交易額可能高達100億美元，但周五股價仍隨大市下跌2.79%。市場對AI股估值憂慮加劇，費城半導體指數一度跌5.67%，較高位調整逾20%，陷入技術性熊市，收市縮窄跌幅至1.63%；納指收市跌361點或1.4%；標指回吐76點或1.01%，報收7457點；道指最多跌566點，收市反覆跌406點或0.77%，報收52146。
SpaceX星艦火箭因技術故障取消發射，目標係幾天內再發射，股價曾插近7%，再創上市後新低，並自高位滑落38%，蒸發一萬億美元市值，收市仍跌5.4%；Netflix今季收入預測遜色，股價一度插12.5%，收市續跌7.3%。Nvidia最多挫4.5%，收市仍跌2.2%，但股價仍企住200樓上，短炒嘅190同195貨未放手。英特爾、AMD及ARM 嘅ADR曾跌乎7%至8%，最終收復部份失地，INTC叫做住條100MA，仲有半注短炒貨105未走，若然呢幾日仲未上得返107條10MA，短炒嘅貨都可能撤退先，去返87-90先搵位買返。META另外半注短炒貨止賺咗640，暫時喺條10MA附近就係643呢啲位，今晚又睇下周五個收市價626守唔守到。
至於DELL止咗380，周五見低位落到50MA 366附近嘅368左右，就彈返上396收市，不過暫時上唔返5、10、20同30MA，今晚先再決定撈唔撈返。至於MU周五短炒咗一轉，見佢入返個780-820個裂口範圍，810撈返半注短炒，早段見無乜力，雞咁腳835走晒，盤中彈到去903，不過阿Man預咗佢880-920成為阻力，盤中短炒無妨，呢個星期睇住780-820呢啲支持位如何又決定上唔上返車。GOOG暫未穿340個防守位，話晒100日線，唔穿就睇多兩日先，反正家下個短炒倉已去到極高現金水平。至於NQ今晚分水嶺維持係28800，支持位仍然係28700/28600/28500/28400，若然下破28400，就要落到28200/28000。上方阻力28900/29000/29100/29200，企穩個29200先再玩高一級。
港股上周繼續反彈，周四最高升至25221後，25008收市，險守25000關。周五雖然曾高開略為再衝高至25166，但其後掉頭回落，至午後更一度跌至24332低位，最終跌幅收窄至446點，報收24562；按周仍再升387點或1.6%。恒指50日線24766收復一日後即顯著失守，目前僅險守5日線，加上極短線呈超買，而在上周已滿足周波幅及月波幅求下，作出調整亦屬正常，恰巧當日亦見有14.6億元北水流出，結速多日北水連續流入紀錄，反映北水於25000水平亦開始獲利。
不過今早港股又生猛返晒，恒生指數高開272點，報24835，甫開市已重上50日線，好友隨後再發動攻勢，大市升幅迅速擴大至最多593點，高見25155，差少少無有打穿上周五高位，升勢其後回順。恒指半日收報25072，升510點或2.08%。國指升223點或2.75%，報8360；科指升134點或2.91%，報4757。大市半日成交1656.86億元，北水淨流入4.16億元，純半日成交額同北水積極程度，25000樓上嘅動力確係減弱咗，但100日線大約25216喺成交未能價量齊升配合下，無咁容易挑戰成功，有機會暫時喺25000水平三幾百點，做下高位震盪整固一下先，而下方條50日線失而復得後需守，而10日線亦接近20月線大約24300水平為下一支持，至於23800條20日線就不能再失，如果顯著跌穿20日線，整個反彈浪有機會結束。
麥狄文
(徐狄怡‧證監會持牌人)
