2024年4月24日
美國4月份綜合採購經理指數(PMI)按月下滑1.2，為去年8月後最大跌幅，美債息回落；而中東局勢暫時未有再惡化，市場焦點重回美企季績表現，美股周二造好。道指升263點或0.69%，標指升56點或1.2%，納指升245點或1.59%。反映中概股嘅金龍指數更升近2%，重返6000水平，帶動隔晚港股夜期及ADR造好，大市今早裂口高開。恒指兩日回升604點後，半日再升逾200點，重上萬七大關，逼近兩星期前高位17190。
恒指高開164點，升幅一度收窄至105點，見16934半日低位，但喺科網股全線造好帶動下，大市衝破萬七關，最多升318點，見半日高位17147；其後升勢回順，恒指中午收報17110，升281點或1.67%。國指升107點或1.8%；恒科指升90點或2.6%，報收3539。半日成交額增至708億元，成交增加配合升勢。
重磅科網股全面向上，騰訊(00700)升勢如虹，半日再升2.2%，只要企穩330元，短線有望再向上挑戰350至360元。美團(03690)亦再升2.3%，重返紅底後，100元水平料有支持。京東(09618)跟阿里(09888)半日升逾3%；小米(01810)升2.7%；百度(09888)、攜程(09961)及網易(09999)升1%以上。快手(01024)跟嗶哩嗶哩(09626)半日齊齊升逾6%，後者獲大行調高目標價。
金融股之中，以內銀股較弱，或受美國擬出招制裁有關，建行(00939)無起跌，工行(01398)逆市跌0.24%，中行(03988)升0.5%，招行(03968)升1.5%。至於中午出季績嘅港交所(00388)，績前表現勇猛，半日再升1.7%，未知市場對其業績反應如何，留意230元守唔守得住。大笨象(0005)升0.6%，呢隻係近兩個月表現最強勁重磅藍籌股，市回佢回有限，市升佢表現勇猛。之前阿Man提過友邦(01299)或早大市一步見底，果然喺45元水平見底回升，再升3.3%；重上50元水平，短短幾日由低位累計回升一成。平保(02318)跟國壽(02628)則升逾3%。
火電股有資金追捧，華能(00902)首季盈利大升1倍，一度抽升8.1%，中午升幅縮至2.4%；中國電力(02380)升2.6%，華潤電力(00836)揚1.4%，大唐發電(00991)漲2.7%，華電(01071)漲2.1%。不過，深交所對天齊鋰業(09696)發出關注函，中午股價大瀉18.3%；同業贛鋒鋰業(01772)受累，逆市跌4.5%。ASMPT(00522)季績理想，上季盈利按年大升1.4倍，股價半日升7.6%。
中東局勢未見惡化，加上中證監出招支持中港兩地資本市場發展，大市氣氛轉佳，更有大行建議增持中港股市，喺港股估值相對其他市場便宜下，有望從新吸引外資入場。恒指於16000至17000已上落一段時間，今次再重返17000大關之上，能企穩三個交易日，有望再挑戰前頂向上突破，首目標為17500，下站再向17800出發。
麥狄文
(徐狄怡‧證監會持牌人)
