2023年10月27日
Google跟Meta公布業績後被拋售，隔晚美股早段低開後曾見反彈，但至中段沽壓再現，收市三大指數續跌，道指跌251點，標指跌49點，納指再跌225點。由於債息高企，令偏高嘅美股受壓，即使美企業績交到功課，但未來增長做唔到好勁嘅數字，市場喺畏高情況下，美股無奈都要回。不過隔晚中概股靠穩，反映中概股嘅金龍中國指數升0.46%，港股ADR升逾百點，夜期亦升近百點。加上內地股市止跌回升，道指期貨反彈，港股噚日回吐40點後，今早一度彈近300點，但仍受制10日線(17376)。
恒指高開115點，其後升幅收窄至33點，見17078半日低位，但萬七關守穩有支持，其後發力向上，最多升298點，見17342，但10日線前掉頭。半日恒指報收17213，升168點；國指收5913，升54點；恒科指報收3762，升50點。半日成交額只有434.68億元，咁嘅成交額，港股都好難見底回升，就算守咗萬七當佢短期見底，亦不過係跌浪中反彈。
雖然美股嘅科技股，因為債息高企及估值較高而受壓，但港股呢邊嘅科網股，估值一直唔算高，只係政策風險有較大折讓無外資再肯陪玩，咁大市反彈要挾淡倉，就一定係推高呢個板塊最快手快腳。京東(09618)重返紅底股，半日升3%，阿里(09988)半日亦升2.2%；美團(03690)跟攜程(09961)半日齊升逾1%，只有騰訊(00700)升少於1%，小米(01810)呢期唔跟大隊，人升佢唔升，人跌佢唔跌，今日就無起跌。
金融股中，內險股表現較差，國壽(02628)上季按年減少99.1%，股價逆市跌2.6%，藍籌之中跑第尾；平保(02318)跌1.4%；中國太平(00966)跌2.6%；新華保險(01336)跌4%；眾安(06060)跌3.9%；其他內險股跌1%或以下。至於大笨象(00005)就升1.5%，友邦(01299)靠穩，港交所(00388)升0.3%。
生科股表現突出。翰森(03692)曾創近4個月高，半日升7.8%，為表現最好藍籌；石藥(01093)急升7.3%；中生製藥(01177)更升逾8%，其他生科股閒閒地升3%或以上。
下周一期指結算，結算前推高嚟轉倉，但又上唔返去啲平均線上面行，反而不利於下月反彈，睇嚟暫時轉倉但受制十日及廿日線嘅話，小心下月開局又再掉頭向下尋底，直至有利好消息如習拜會及以巴局勢好轉，先有機會扭轉級級向下，陰乾下跌之勢，11月或要先低後高。
