2023年7月14日
美國CPI已反映通脹壓力紓緩，隔晚公布嘅PPI進一步顯示通脹或已受控，息口將於短期內見頂，美股連升四個交易日，納指繼續跑贏。美國加息壓力大減，美匯指數回軟，人民幣繼續反彈，反映中概股表現嘅金龍中國指數，創3月底以嚟收市新高，港股喺ADR及夜期時段繼續做好，本周前四個交易日累升近千點後，恒指今早再裂口高開逾百點，其後升勢回順。
恒指高開184點，開市價19534已為半日高位，但成功重上250日線(19372)，其後升幅收窄，一度僅餘13點升幅，見19364半日低位。半日恒指報收19399，升49點，目前於250日線附近爭持。國指則升7點，報6551；恒科指先升後回，半日倒跌16點，報收4220。半日成交額518.3億元，周末前夕資金較保守，加上累升近千點後，資金唔會太積極追貨。
藍籌股個別發展，普遍高開低走，重磅科網股ATMJB，僅餘騰訊(00700)半日仍保住0.2%升幅，美團(03690)早幾日跑贏，今日回都回得快啲，開市無耐已倒跌，半日跌1.6%；阿里(09988)高開95元，但未能企穩，半日倒跌0.7%；京東(09618)跟百度(09888)同樣高開低走，半日倒跌。只有網易(09999)半日仍保持升幅逾2%升幅，但半場亦收低過開市價。值得留意半日仍保持升幅嘅騰訊，下周一起進入業績前一個月嘅禁止買賣期，即係下周一起唔再有回購，屆時未必仲好似今日咁能夠頂得住，350水平或失守。
至於大笨象(00005)半日則升1%，並升至62.8元近5年高位，但友邦(01299)升唔起，半日倒跌，暫仍守80元水平。港交所(00388)半日跌0.7%，暫時叫做守住300大關。其他內銀股及內險股仍錄得升幅，不過升勢唔算強勁。
油價喺美匯指數回落下持續反彈，一度升至3個月高位，三桶油半日升逾1%。另一個表現較佳嘅板塊係中資電訊股，聯通(00762)跟中電信(00728)半日分別升6.2%及5.3%，聯通為表現最好藍籌股，而中移動(00941)亦升1.6%，齊齊撐住恒指保持半日仍錄得升幅。
雖然人民幣回勇，但對內房股跟物管股似無太大幫助，始終銷售說明一切，上半年內房銷情慘不忍睹，暫時亦唔見得下半年有本事扭轉頹勢，內房物管股普遍回落，碧服(06098)半日跌3.3%，藍籌之中包尾。汽車股亦腳軟，比亞迪(01211)半日跌1.2%；理想汽車(02015)半日跌1.7%；小鵬(09868)跟蔚來(09866)半日齊跌逾3%。
當恒指重上250日線，市場普遍認為港股將繼續向上挑戰100日線(19675)，甚至更高水平，不過回望返上兩個月，每當恒指反彈至100日線附近甚至影都未見，港股就再度掉頭，今次能否打破宿命，仍屬未知數。當然短線大市出現超買，略為回吐亦正常，暫時先睇今日能否守住250日線收市，下周一無咗QQ嘅回購，少咗呢份支撐，睇下港股會否下破50日線(19278)，回吐能守50及250日線，港股仍有機會向上挑戰100日線，甚至日線保力加通道頂部，相反，此兩線再失，10日線(18949)及20日線(19106)係較大支持，尤其20日線為保力加通道中軸，一但再失守，又將回復弱勢，再度向日線保力加通道底部出發。其實港股仍然係上落市格局，暫未走出18000至20000移動區間，大戶不過係睇餸食飯，上下其手。
麥狄文
(徐狄怡‧證監會持牌人)
