2022年11月4日
雖然隔晩美股連跌第四個交易日，但中概股表現硬淨，加上夜期跟ADR未有跟隨美股下跌，唔多唔少預視今日港股回升，恒指噚日回吐逾400點後，今日重新出發，好友發功下，恒指一度升逾900點，更成功收復20日線(15986)。恒指高開103點，報15442已經係半日低位，其後升幅持續擴大，成功升破10日線(15347)，10日線企定買盤湧入，進一步上破20日線(15986)，半日更成功突破16000心理關口，最多升928點，見16267半日高位。半日雖略回至16200水平，但半日仍錄得874點升幅，報收16213；國指中午報收5511，半日升340點；恒科指更怒升7.7%，半日報收3269點。半日成交額887.2億元，半日有咁嘅成交額，一定要尊重一下。
藍籌股全線做好，連一向弱勢嘅內房股都有得升，資金入場有殺錯，無放過，友邦(01299)半日升3.4%，大笨象(00005)升2.4%，港交所(00388)半日更升6.8%。比亞迪(01211)上月銷量增加1.4倍，半日升6.2%。平保(02318)亦做好，半日升7.4%，真係無乜幾可。
中概股翻生，有傳聞指美國對中概股審計告一段落，中概股安然過渡，今日科網股升勢凌厲，ATMJ，以美團(03690)半日升8.6%升得最少，阿里(09988)跟京東(09618)半日升逾12%，騰訊(00700)亦錄得近一成升幅。其他科網股至少都升逾半成，升逾一成嘅科網股比比皆是。
內地又傳放寬防疫措施，市場憧憬短期內通關，餐飲零售股全線向上，呷哺呷哺(00520)爆升17.3%；九毛九(09922)大升11.6%；奈雪的茶(02150)急揚6.4%；海底撈(06862)抽高9.6%；海倫司(09869)爆升17.3%，餐飲股板塊表現強勁。內需股亦唔執輸，體品股普遍升半成以上，李寧(02331)更急升13%。
內房股半日借勢抽上，不過內房民企相繼違約，就算今次跟隨大市反彈，仍充斥住不明朗因素，其實仲有蟹貨，或者可以趁呢下反彈逃生，內房一日搞唔掂啲債務問題，都係有波幅，無升幅。
港股今日又嚟借消息千升，能否扭轉之前弱勢，要睇住16500有有本事上到兼企定定，另一個指標係條20日線，若然條20日線都守唔住，今日又係借消息純挾淡友嘅技倆，但如果守得住條20日線，喺短線超買再喺20日線樓上整固下，仲可以有條件再挑戰16500水平持續反彈，相反，失20日線嘅話，呢下反彈隨時又玩完。
麥狄文
(徐狄怡‧證監會持牌人)
