2022年2月23日
俄烏局勢持續緊張，隔晚美股顯著下跌，道指更一度跌逾700點，雖然收市跌幅收窄至482點，但走勢明顯轉弱，而避險情緒持續高漲。不過，市場暫時消化烏克蘭危機，美股三大指數期貨於亞洲時段回升，加上A股反彈，港股三日累跌1272點後反彈，但恒指半日僅回升162點，暫受制23700。
恒指高開97點，早段升勢不保，一度倒跌19點，見23500，港股喺美期跟A股回升下止跌回升，半日最多升174點，見23694，受制23700。中午恒指收報23682，升162點；國指報8325，升54點；恒科指收5296，反彈69點。半日成交額只有657.1億元，似乎市場對博反彈唔太熱衷。
藍籌股個別發展，中移動(00941)半日升0.3%，啱啱派完成績表嘅大笨象(00005)跟恒生(00011)，噚日下半場跌幅擴大，今日半場則見反彈，分別回升3%跟0.7%。中銀香港(02388)部份分行員工確診，今日起暫停營業，股價半日跌3.3%。創科(00669)主要客戶家得寶(Home Depot)公布季績後股價急跌9%，拖累創科半日跌逾4%，成為表現最差藍籌股。
至於重磅科網股今日普遍反彈，美團(03690)連跌三日後急彈，有官媒為其發言，下調平台費或影響估值，但不意味前景堪憂，美團股價反彈5.7%，成為今日藍籌升幅冠軍。ATMXJ其他成員亦見反彈，騰訊(00700)升0.7%，阿里(09988)升1.1%，小米(01810)半日反彈不足1%，京東(09618)半日升2.8%表現最好，其他科網股半日亦見反彈，不過力度唔算強勁。半日炒作氣氛較熱鬧係商湯(00020)，自從有北水加入之後，個場又好似旺返少少，不過今日炒咗上去就無謂追貨，落返7元邊可以考慮。
燃氣股弱勢持續，噚日批股跌到一仆一碌嘅天倫燃氣(01600)，半日再跌多2.8%，其他燃氣股持續下跌，只有中國燃氣(00384)半日反彈0.5%。其他股份都係咁上下，暫時市況較為反覆，都係輕倉為上，俄烏局勢嘅任何消息，都可以左右大市上落，政治市難測，依家未係博殺嘅時候。
麥狄文
(徐狄怡‧證監會持牌人)
