2022年2月23日

【輪證贏家】小時圖見STC觸底

噚日揀咗隻恒指Put(23955)出嚟，雖然指數去到尾市時段慢慢呈上，但都係收市時見到Slow STC(14,3)兩線先踩返上80以上超買水平；重點係噚日下晝要落診所打第二針，所以基本上3點打後都無再睇到個市，唔緊要，市日日都開嘅。

噚日傍晚林鄭出嚟見記者講學生們提早暑假(定寒假？)兼全民檢測，以出生年份劃份，設有關愛，可以帶同老人家或小童一齊去做，我聽完之後同我家老爺講：呢個玩法咪同換身份證一樣？咁點解身份證要換四年，但佢一個星期就可以搞掂？呢個無答案嘅問題，留番神去解答。

依家9點52分，恒指完U後再開市，還好開市到依家喺五分鐘圖上面見到指數都傾向橫行走動，仲開始被條50分鐘線(五分鐘圖10線)同500分鐘線(五分鐘圖100線)挾住，而今日11點左右，財政司司長陳生就會宣讀佢嗰份啡色封面嘅《財政預算案》，隨時個市都係悶住等份《財政預算案》出爐，比較例牌可以留意嘅係本地地產股同一啲創科類股份，話唔定有啲「有用嘅措施」會刺激到股價。

嚟到10點鐘，恒指喺小時圖上暫時未見到上破到最近嘅10小時線，不過，喺五分鐘圖上已經見到指數稍稍回落到100分鐘線(五分鐘圖20線)之後企穩再踩住上，正正就喺呢個位陰陽燭圖上見到「早晨之星」嘅組合，但擺位上呢個絕對唔係一個低位，喺作戰室裡面都有同戰友們講可以試下偷呢個位出好倉博指數踩住100分鐘線再上又好、見「早晨之星」嘅組合都計數又好、上到500分鐘線爬格仔都好。結果，嚟到依家10點18分，恒指上破到500分鐘線後稍稍回落，唔通今日指數打算以一浪高於一浪嘅走勢行返上高少少嘅位置？

乃念小時圖都輕輕上破咗10小時線兼Slow STC(14,3)兩線觸底回升，恒指牛(68047)，收回價23108點，同現價有逾500點差距，可以吼五分鐘圖Slow STC(14,3)回落返去超賣水平時出場，但以小時圖做trade，可能會比較適合用於睇呢個欄目嘅讀者。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。