2022年2月15日
俄烏局勢緊張，直接影響金融市場震盪，美股三大指數隔晚連跌第三日，不過烏克蘭總統澤連斯基稱希望通過談判解決問題，美股期貨喘穩，可惜港股表現仍反覆，一度跌穿24400，係10、20及100天線匯聚區。恒指今早低開98點，一度止跌回升，最多倒升13點，見24570半日高位，可惜無以為繼，其後再受壓，最多跌180點，見24376，中午挨近半日低位收市，穿咗24400匯聚區，唔排除午後考驗24200下個支持位。
恒指中午報收24383，跌172點；國指收報8533，跌84點；恒科指跌不足1點，半日報5502點。半日成交額只有563.95億元，市況淡靜可見一班。
藍籌股個別發展，大笨象(00005)下周公布業績，市場雖憧憬派息或增加，以及加大回購力度，但畢竟大笨象都炒高咗兩成幾上嚟，60元關不破，回頭亦好合理。ATMXJ，只有京東(09618)半日仲有0.3%升幅，其餘嘅成員均腳軟，但跌幅尚算溫和。汽車股今日表現唔錯，比亞迪(01211)跟吉利(00175)半日分別升2.7%及1.8%。噚日強勢嘅潤啤(00291)，今日繼續逆市走強，半日升2.7%。
內險股跟內銀股半日走弱，係拖累大市下跌嘅元兇。國壽董事長王濱上月落馬，內媒報道指主要關乎他主政太平集團時期的經歷，內險股全線向下。內險股半日跌幅閒閒地達2%，友邦(01299)唔係內險亦受拖累跌1%。至於內銀跌幅亦由1.3%至3.3%不等，當中以建行(00939)半日跌3.3%，跌得最多。
生科藥股今日見反彈，藥明生物(02269)半日升逾8%，係表現最佳藍籌股，其他生科藥股升幅由超過半成至一成不等。不過講真藥股板塊弱勢已成，就算反彈都係死貓彈咁上下，阿Man就唔會追貨博佢彈高啲，依家識唔識企返穩都成疑問，都係眼看手勿動。
麥狄文
(徐狄怡‧證監會持牌人)
