2021年11月2日
美股喺11月首個交易日造好，三大指數續創收市新高，就連之前弱過藥煲嘅中概股都反彈，港股喺連續五個交易日累跌近千點後，今日終見反彈，收復20天線(25298)及50天線(25292)匯聚區。
恒指高開454點報25609，之後最多升485點，見25639點半日高位，其後升幅收窄，一度升少過100點，見25251點半日低位。恒指中午收報25339，升185點；國指升64點，半日收8963點；恒科指則升143點，收報6422點。
藍籌股個別發展，友邦(01299)升1.3%，大笨象(00005)僅微升0.2%，港交所(00388)則升0.2%，內銀股普遍下跌。ATMX之中，只有騰訊(00700)先升後回，半日倒跌0.3%，美團(03690)半日升5%，阿里(09988)半日升1.8%，小米(01810)半日升0.4%，其他科技股也普遍向上。
阿Man就較為睇好京東(09618)，話晒雙十一逼近，點都應該趁機炒一炒，半日股價升4%，同系京東健康(06618)及京東物流(02618)分別升3.8%和4.1%。
不過唔少科網股高開後無以為繼，中午升幅收窄，騰訊仲要倒跌，可能業績公布前，缸邊友都唔敢入場，都係觀望為主。
要數呢期至當炒兩隻股，都係size較細嘅創維(00751)同億和(00838)，自從啲重磅股得一注資金唧嚟唧去，唔少炒鬼寧願博炒返啲股仔。如果要問阿Man呢兩隻股點睇，都係嗰句，入得場炒遇咗波幅大，定好止蝕要參與，都要心臟夠強大。創維升到5元剛好到周線阻力位，而億和周線破咗位，要睇月線圖做參考，2.5元阻力唔嘢少，總之炒股仔就要轉身快，自己識執生。阿Man當然唔會阻人發達，但自問無乜本事同心臟唔夠強大，股仔太刺激，呢杯茶飲唔落。
今日暫時都係睇返啲新能源股同電動車相關股份，反而回吐可以吼位上車，反正資金都未有離開過呢啲板塊，唔趁回吐嗰日特價上車，唔通又升嗰日嚟追貴貨咩。
麥狄文
(徐狄怡‧證監會持牌人)
