2021年5月24日
周末我家兩口子通常都係喺屋企靜靜地過，隔個星期到先至回娘家陪老媽佢哋打下牌；朝早無聊開電視等個廳有啲聲，咁啱做緊套日劇，仲見到有村架純，即時問坐我右邊嘅老爺：有村架純、結衣BB，二選一唔準諗即刻答。「國民老婆」真係唔係浪得虛名，不過我家老爺如果有第三個選擇嘅話，佢會揀《極道煮夫》嘅川口春奈(痴線！你以為佢會答係我呢...你太唔了解佢啦！)我都真係有啲搲頭，anyway，有村架純、川口春奈，二選一唔準諗你會點答？
依家9點46分，恒指今朝跌40點開市，至依家跌幅擴大至跌131點，做緊28326點。都唔難估到恒指開市後會再向下衝，事關有留意到五分鐘圖今朝做完U盤之後，條SlowSTC(14,3)都見到其實係未到底，去到呢一刻都見SlowSTC(14,3)只係挨住30幾呢個位橫行；反唔反手喺依家呢家就係睇9點45分喺暫時嘅低位出咗粒似疑「錘頭」，一旦有力向上破到50分鐘線(五分鐘圖 x 10線)，就可以小注好倉博即市向上再破100分鐘線(五分鐘圖 x 20線)。
再望望個股，上星期五(5月21日)收市後恒指服務公司公布今年首季恒指成份股檢討結果，極度爆冷！大熱京東(09618)同網易(09999)完全無影，唯一貼中嘅竟然係隻比亞迪(01211)，前兩者U盤時都見到嗰一地眼鏡碎有幾碎，而後者則飛咗上天。至於信義光能(00968)同碧桂園服務(06098)今朝早都逆市造好，但都可能因為恒指弱雞關係，小時圖上已經長長上線影出現，不過形態同走位始終都比京東同網易好得多，尤其是隻京東。
喺京東小時圖上見到股價於上周五已受制於150小時線(1小時圖 x 150線)，及至今日裂口下行後，依家10點5分見股價進一步失守20小時線(1小時圖 x 20線)，亦即保歷加通道中軸，SlowSTC(14,3)勢頭向下，最近有條50小時線(1小時圖 x 50線)，依家見大約喺$227.6水平。京東熊(59169)，收回價$300，同現價有逾7%差距，逾11倍槓桿DT合用。
Check埋佢五分鐘圖，保歷加通道口拓闊之餘，整條通道都係向下中，明白到SlowSTC(14,3)已經出現超賣再超賣嘅情況，所以先喺小時圖著手，唔知佢上唔上得返條50分鐘線，但求小時圖個走勢未變時可以摺得到呢個位入場啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
