2021年5月21日
我家老爺特別要我喺呢度同大家講聲「多謝」，事關噚日【輪證下半Part】講咗我買咗份生日禮物比佢，大家都好雀躍咁PM我，叫我同佢講聲生日快樂，放心啦，佢全數收到架啦，只係正日其實係聽日，anyway，佢好多謝大家，我都好多謝你哋。
依家9點49分，喺地鐵時見到恒指做完U盤開升逾130點，不過，細看五分鐘圖就見恒指SlowSTC(14,3)上到超買水平，所以早早喺聊天室都講定如果開市後見五分鐘圖上陰陽燭出高開低走嘅形態，可以考慮小注淡倉；到SlowSTC(14,3)都見到掉頭的話，開淡倉嘅策略就可以再肯定多少少。及至依家見恒指五分鐘圖第一粒燭出高開低走嘅實心陽燭，SlowSTC(14,3)都已經由今朝超買位修整過後，%K線跌穿%D線，聊天室戰友如果你已經開咗淡倉嘅話，下一步就要睇住保歷加通道有無拓闊比位恒指再落。
今日收市後恒指服務公司會公布今年度首季檢討結果，目前市場大熱新晉藍籌有京東(09618)及網易(09999)，比亞迪(01211)同李寧(02331)嘅呼聲都唔弱，見呢四隻嘢今日隨市高開後，至目10點7分都死咬住個高位就知。
彈到咁高兼隨時下個星期一(5月24日)返嚟先收成當然唔係我杯茶，於是繼續嘗試喺個股搵位，結果路過見到隻港交所(00388)，日線勢頭似乎不錯，SlowSTC(14,3)都上行中，不過就見到指數於保歷加通道中軸有止步情況。換個五分鐘圖(本身唔應該咁，就係被兩個message搞到我miss咗個位)就見SlowSTC(14,3)已經下行至嚴重超賣範圍，基於保歷加通道口有拓闊嘅情況，所以SlowSTC(14,3)極有可能會出超賣再超賣。再換遠少少，去到小時圖見股價落到保歷加通道中軸，SlowSTC(14,3)算是超買範圍向下落緊，一旦跌穿，似乎可以向保歷加通道底部出發。
呢鋪比少少耐性，事關港交所五分鐘圖條SlowSTC(14,3)隨時彈返起，對入淡倉有啲不利；更何況都想再比多少少時間睇港交所小時圖穿唔穿條保歷加通道中軸。港交熊(59579)，收回價$470，進取嘅如見港交所五分鐘圖不破50分鐘線(五分鐘圖 x 10線)或100分鐘線(五分鐘圖 x 20線)就出手；安全嘅等SlowSTC(14,3)上返去超買範圍見高位回落時先出手。同樣地，如見小時圖保歷加通道中軸有支持的話，就唔好出淡倉啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
