4月29日 13:34
當今朝仲諗緊會唔會上去17900點食17800至17899點嘅全層熊證之時，上半場未完恒指高見18031點，如果你係近呢一年先涉足股市的話，我諗見180字頭都有少少超越你嘅認知。
今朝揀咗隻恒指牛(56237)，如同上個星期追貨咁追，喺五分鐘圖上見10線借到力就出手，雖然日線計指數已經重奪250天線，不過六連升之下亦都有少少高山症反應出現，所以都有喺作戰室同大家講定聲操且戰且走策略，拉實量度線，作戰室同樣都係以五分鐘圖10線為即市好倉量度線架咋。
以今朝Patreon出文時間為10點，如常用10分鐘時間睇文的話，即於10點10分再重新睇返走勢圖。五分鐘圖上見指數出下影線踩住10線未穿再上，再過多五分鐘已經10線有推推高指數，(56237)可以出場。
繼續同樣以10分鐘作為買貨時間的話，即於10點15分至10點25分出隻(56237)，期內高低位做過0.068元/0.061元，平均買入價為0.0645元。
指數愈來愈有，喺11點正終於都見佢上到18000點位置，首三層熊證全數被收回，當中包括重貨區17800至17899點，而呢三層熊證夾者有相當於2009張期指街貨，大戶肥、手執牛證都好肥。
見高走貨當然合理，而如常嚴守策略的話，喺大約11點25分見指數失守五分鐘圖10線，(56237)同平時一樣用10分鐘時間作為散貨嘅話，期內高低位做過0.081元/0.067元，平均走貨價為0.074元，呢一起一個鐘頭多少少嘅好倉，平均有9.5格或14.73%落袋。
食完個飯返嚟指數Keep住向下行，同作戰室一齊已經正數落袋嘅你，正數落袋Ok啦，咁下半場就專心工件啦！
作者阿珊，以技術分析專心玩輪證，唔貪心，努力賺取我家肥貓罐罐。
