1月24日 14:00
仲以為呢排天氣凍，個市熱；誰不知今日指數都係凍冷風。今朝睇過恒指失守日線圖上「大型下降通道」後，通道底線水平同10天線差唔多，一旦爬唔返上去嘅話，恐怕「大型下降通道」之後再要重新畫過一條新嘅「下降通道」。
如是者，今朝揀咗隻恒指熊(67054)，借小時圖Lock實條50線，再用五分鐘圖嘅平均線+量度線，逐線逐線向下打，唔貪佢用日線落地獄。以今朝出文時間10點12分計，如常的用10分鐘作為睇文時間的話，即喺10點22分再睇返走勢圖，見指數仍然保持處於50線以下水平，仲要出埋上影線添，一粒「射擊之星」加條50線擋路，出淡倉真係非常perfect。
再保險啲睇埋五分鐘圖，見當時指數已經回高位向下回落，並失守10線，Slow STC(14.3)兩線已出觸頂向下，就算玩半截Swing都仲有位。
以10點20分起計如常用10分鐘作為買貨時間，期內(67054)高低位做過0.058元/0.055元，平均買入價為0.0565元。
落場後按策略用五分鐘圖嘅平均線或者量度線向下逐線逐線打落去。打到去下半場1點15分，落到100線之後唔過落，比多五分鐘仲見佢似企穩，打唔落就唔再hold淡倉啦。以1點20分起計同樣用10分鐘作為走貨時間的話，即1點20分至1點30分，期內(67054)高低位做過0.071元/0.064元，平均走貨價為0.0675元，咦？呢一趟平均都有11格或19.47%賺幅，Ok喎。
依家1點38分，指數踩住五分鐘圖100線向回返唔少，小時圖上亦見10線好似有啲支持咁款，當然今朝睇嘅50線仍然成為阻力啦，既然正數囉，凍凍地落樓下篤串燒賣暖下身算啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
