今日 10:50

輪證贏家丨沒有北水的第四日·見字飲水

噚日恒指都係偏乾燥，全日成交都唔過千億；由於噚日要返醫院抽血嘅關係，所以提早一個鐘熄機，依家等緊完嗰競價時段，睇返個五分鐘圖，又係最後一棍炒咗上去；有本事隊足一日啦。

無咗爺爺，港股變得什麼都不是，所以再次向個股招手，執咗隻阿里巴巴(09988)，皆因日線圖都有幾個印花集齊得到；所以揀埋隻阿里牛(60844)，入貨位盡力咬返住五分鐘圖啲Swing出好倉嘅位，即係Slow STC(14.3)見觸底見好出動，有咩事變返用五分鐘圖Swing一趟做Day Trade都仲得。

呢一注係好貪心咁博日線圖Slow STC(14.3)成功出到觸底上+借中軸企返住嚟再爬上保歷加頂線/100天線(約113元水平)；雖然有拉到盡借五分鐘圖Slow STC(14.3)觸底先出隻好倉，但噚日見股價都係咬住108呢個位，輪證又無郁過，姑且放多一日。

今朝起身見到美股出綠燈，心諗港股唔升都應該守得住掛，誰不知一開市就跌返落去牛層第一層街貨，阿里當然低開啦，擺位亦都落返去日線圖嘅20線以下，失守下方量度線，(60844)唯有敗走。

唔緊要，今日都有市開，有市開就有得追，見指數今朝低開，五分鐘圖都執到啲可以出到淡倉嘅訊號，所以都Plan定出淡倉作為今日第一注，到依家仲有3分鐘就10點，已經有戰友食咗兩Round淡倉，等睇10點後Update嘅小時圖。
10點後確認指數低走於小時圖10線，而保歷加通道口亦都有見繼續保持收窄，SLow STC(14.3)則未到超買位就已經見到%K線低走於%D線，淡倉再Hold/再出都先望住下方中軸線；過得到嘅話就再換返個保歷加通道出嚟睇吓條底線咩環境先。

恒指熊(65398)，收回價24550點，同現價有約440點距離，槓桿有約53.7倍，雖然係同一收回價只係第二最高，但佢嘅街貨低於最高槓桿嗰隻(咁第二最高都唔係好差啫)。

依家10點10分，五分鐘圖上見SLow STC(14.3)已經落到超賣位㗎啦，同時有見保歷加頂線向下，即係話喺五分鐘圖上指數先有條件出Swing走勢。咁樣嘅話就睇吓指數會唔會喺五分鐘圖先出Swing上行到10/20線見阻力時，先至再出隻(65398)啦。

呢兩日真係好乾，男士都要搽潤咀膏同真係要飲多啲水。

作者阿珊，以技術分析玩輪證，唔貪心，努力賺取我家肥貓罐罐( Φ ω Φ )。

想睇埋美日台股、金油匯幣ETF嘅玩法，請往Patreon搜尋「cbbcwar」；《傻寶不懂的技術分析》系列已於Google Books Store上架，可免費試閱。