8月12日 10:38

【輪證贏家】騰訊牛捉業績

噚日揀咗隻恒指熊(63062)出嚟，由於出文時都估到五分鐘圖Slow STC(14.3)應該觸底緊去超買位，所以索性如常地用返Slow STC(14.3)觸頂博Swing Trade向下。

喺噚日上半場於11點25分見Slow STC(14.3)上到超買至11點45分見確認下行期間出(63062)，按期內(63062)高低位(0.048/0.045元)計平均價0.0465元作為平均買入價。

持貨至下半場見Slow STC(14.3)到超賣位，完成一趟Swing trade後，(63062)同時亦完成任務可以離場。按期內(63062)高低位(0.052/0.048元)計平均價0.05元作為平均沽貨價，呢一趟快執3.5格或7.53%。

每朝大約8點半左右都會喺作戰室裏面同大家睇新嘅街貨圖、recap日線+小時圖兼揀定貨準備開U再開市，所以造就到戰友們唔睇圖都背得到大約個市行緊乜，Day Trade反應變得快好多。

由7月底到依家見個日線圖都係戀住條中軸線，上落範圍大約都係喺247至250，還好久違了無畫嘅「上升通道」仍在；而以黃金比率做分割的話，0.618嘅248就好似做咗「磨心」，近呢半個月就喺呢條線上面磨嚟磨去，真係磨到汁都出。

完U後見恒指開市82點，報24824點，及至正式開市之後，指數低開高走上行返到大約24888點左右，呢期啲波幅係咁上下架咋，最麻煩嘅係呢口價亦都係今日牛熊證嘅中間位，怕且今日都仲係發吽逗嘅多。

望望鐘依家10點8分，指數都未有方向。作戰室今朝索性開咗兩隻個股玩，一隻係噚日喺新城都有講過嘅滙控(00005)，再博佢見多次「紅底」唔難，難佢守穩「紅底」先係今次嘅任務。

另一隻就係聽日收市後就會公布業績嘅騰訊(00700)，老實講呢隻嘢嘅業績如無意外都真係正正常常，隨時正常過啲內銀，可能係馬化騰乖寶寶掛，所以大行普遍都係看好為主。

日線圖上見股價喺高個星期高位572元向下回落至目前有似10線位企住，Slow STC(14.3)係未轉向架，日線圖又邊有咁快呢。

所以留意住10線位(556.05元)，守得到嘅出隻好倉出去炒業績(唉~ 都唔知用「炒」呢個字啱唔啱添呀)，向下再借20線做止蝕位，即係牛證收回價擺低於546.55元，大把啦，騰訊牛(63400)，收回價545元，同現價有約14蚊距離，槓桿有約27.3倍，低街貨都係佢嘅優點。

準備出文前再睇鐘大約10點25分，日內出倉嘅話，騰訊小時圖10線守好啦，最好比埋條20線嚟啦！有耐性嘅等返之前畫住嘅位都可以。

作者阿珊，以技術分析專心玩輪證，唔貪心，努力賺取我家肥貓罐罐。

直接去Patreon搜尋「cbbcwar」領取七日免費試用即市作戰教室

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。