4月8日 12:52

【輪證贏家】比迪牛試避開風眼

今朝出咗去睇醫生，所以今日只會得一隻上晝文，仲要差唔多完上半場先至出；而下午嘅【輪證下半Part】會暫停一日。

今朝指數着返盞綠燈，最多見升逾600點，唯臨完上半場前15分鐘，升幅已經收窄到得290點。

5分鐘圖上有見指數今日暫時有條50線接住，同步20000點算是比返出嚟，身邊都有唔少朋友出嚟問撈得底未。認真，一日跌3000幾點全街啲貨都真係好似割喉式減價，好吸引，但要留意減價背後嘅原因係關稅戰引發出嚟；政治市之下不得不睇多少少新聞。

美國宣布「對等關稅」後，中國宣布向美收返34%反制關稅，而美國再Update返如果唔Cancel嗰34%嘅反制關稅，咁個關稅就加碼到50%；而中國只有今日一日時間考慮，不過，商務部一句「奉陪到底」明顯已經有晒答案。

然而，亂世中先執第一Round平貨亦都無可厚非，一堆個股中，被人執返起叫做執得有力嗰隻叫做比亞迪(01211)。

如果話要搵一啲個股喺業務上可以「完美地」避開美國而唔受/無咁受「關稅」影響嚟計，算是「有限」。按集團於最新業績中顯示，集團喺美國嘅乘用車銷售為零，關稅對其主營業務(乘用車)無直接衝擊、至於商用車業務則通過美國當地生產，所以緩解咗關稅壓力。但由於核心部件如電池仍然要由中國進口，如果美國進一步擴大關稅範圍至電池或者關鍵零部件(目前已對鋰電池徵收25%關稅)，比亞迪嘅生產成本則可能上升。

呢個世界都真係環環相扣，或者比亞迪都只係比其他稍為好少少。

日線圖上見比亞迪噚日一樣大裂口向頭，不過100天線似有支持，而今亦隨大市高走返，Slow STC(14.3)兩線未見觸底但有見超賣範圍橫向中；換保歷加通道口亦都只係見佢拓闊咗少少，未腿張開咁收唔返。

比迪牛(69666)，收回價305元，同現價有約21.8元距離，槓桿有約12.1倍，為市場上第四貼價比迪牛之中、高槓桿、成交活躍嘅選擇。

記得呢啲風高浪急嘅日子，注碼唔好咁大，同平時用返5分鐘圖借Slow STC(14.3)或保歷加頂底線玩Swing都可以；如果傾向以正股進行部署嘅話，分注亦都係一個合適嘅做法。

作者阿珊，以技術分析專心玩輪證，唔貪心，努力賺取我家肥貓罐罐。

想減低Day Trade失敗率?!試吓搵作戰教室幫你，7日免費試用：https://www.patreon.com/join/cbbcwar

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。