3月24日 13:32

【輪證下半Part】比迪牛暫有18.75%正數落袋

今朝真係唔多想掂個市，皆因指數上落幅度唔高之餘，盞燈成日轉，都算啦，波幅愈來愈細嗰下先至覺得佢煩，半日成交先得嗰1200幾億，唉，你玩埋我嗰份啦。

所以，趁個業績期仲有條尾巴喺度，所以轉戰嗰股，先執隻今日收市後會公布業績嘅比亞迪(01211)，借佢小時圖企好喺條50線之上而揀隻比迪牛(56725)*插一句提外話嘅係今朝出文時因為都比較遲，趕趕地之下執咗貨，不過之後都改番啱啦，感謝指正嘅讀者及戰友們*。

以今朝出文時間為10點39分，如常的用10分鐘作為睇文時間，則於10點49分再睇返個走勢圖，當時股價做緊392.6元，仍然守於50線之上，符合出(56725)嘅條件。

同以10分鐘作為買貨時間的話，按期內高低位做過0.049元/0.047元，平均買入價為0.048元。

無Set目標價，只係Set咗如果穿小時圖50線就走貨。呢注持貨至午後返嚟有見連10線都上埋，如果係諗住博業績靚仔嘅話，咁隻(56725)就應該要過夜，同時Lock好50/10線作為下方量度線， 只係小心整條保歷加向下，即使股價同Slow STC(14.3)有條件出觸底上，但都要真係有平均線借住先至好，否則見有格仔先爬走都可以。依家1點20分見(56725)證價有0.57做過，平均計都有9格或18.75%落袋，都好似已經幾不錯。

溫馨提示嘅係，有時業績靚仔股價都唔一定係會升，因為有一種玩法叫做「借好消息出貨」，即係見光死。

作者阿珊，以技術分析專心玩輪證，唔貪心，努力賺取我家肥貓罐罐。

想減低Day Trade失敗率?!試吓搵作戰教室幫你，7日免費試用：https://www.patreon.com/join/cbbcwar

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。