今日 10:37
噚日揀咗牛熊各一隻出嚟，寫文嗰時已經講明當時五分鐘圖Slow STC(14.3)兩線都落到超賣位，所以係睇住五分鐘圖嘅Slow STC(14.3)有見觸底上嘅話，就比隻揀好咗嘅恒指牛(60156)，以小注出動博日內出觸底反彈，目標係小時圖畫好嘅區間位(約23300點至23488點)嘅頂線。
呢一注都做到嘅，平均仲有兩成幾嘅正數；但係用喺日線圖嚟出好倉嘅話，都真係未得住。雖然呢兩三日喺日線圖上已經見到指數處於「下降通道」底線，唯Slow STC(14.3)遲遲未確認觸底(%K線數值都未高過%D線)。
「咁要跌到幾時先至可以撈底呀?」須知道有個循環嘅玩法，而要停止呢個玩法，按慣過去嘅情況，基本上得兩個解決方法：1. 市場上有重大嘅利好消息出現，重大到係可以將全個市場嘅風向180度扭轉；2. 牛熊嘅街貨層距離收窄嘅同時街貨數量亦接近一半一半。呢個循環喺作戰室早兩日都有提過，所以作戰室呢兩日都係keep住出淡倉等佢瀡到Day Trade位有見觸底啦，就收手(純綷我自己唔鍾意過夜啫，唔代表佢哋唔可以嘅)。
今朝指數低開23點之後旋即向下，作戰室再開出即市淡倉追落，到依家10點10分，恒指已經落到重貨牛證23000至23099點呢一層，清埋佢都真係唔難，但同時都要預一預於23000點可能求其打兩吓攻防戰，話晒都係一個整點數位。
話港股係廢墟都真係無錯，見眼日韓兩市都無乜嘢，仲好刺激添。之前韓股大熱，一窩蜂湧晒去海力士同三星啲ETF度，無計，喺港股世界玩得到韓股嘅實在有限，又解釋到點解呢堆ETF成交推到咁大。
近呢一兩日，日Yen又跌到媽都唔認得，日股變相大割引，仲唔湧埋嚟等咩呀?
依家10栗18分，日經升返2500幾點，喺日線圖上見呢條靚靚嘅「上升通道」喺港股身上係可遇不可求。依家距離高位72831唔遠，又有條10天線接住，係要小心Slow STC(14.3)目前見兩線向下啫。
所以，借好10線，最多最多借到20線(因為range太遠，最好自己喺兩線中間再mark多個位嚟做分間)，跟住日經Call(11173)，行使價90000點，槓桿有約8.96倍，今年12月11日到期，屬低引伸、輪證價，換股比率低於1000，敏感度偏高。
重申多一次，日經依家波幅唔細，鎖定止蝕位嘅同時，亦宜通過注碼嚟控制風險。
作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。
想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Boook Store上架，可免費試閱。
資訊只適用於合資格的香港投資者。本文章涉及瑞銀以外第三方機構代表之意見，其所發表的言論和觀點僅代表該第三方機構及/或其代表之個人立場，並不代表瑞銀及與瑞銀無關。資訊由瑞銀集團提供，其僅作參考，並不構成買賣建議、邀請、要約或游說。瑞銀為結構性產品的發行商，瑞銀及其成員、其聯屬公司及董事及僱員可能持有本資料所述證券之權益(作為主事人或其他）。結構性產品並無抵押品。如發行人無力償債或違約，投資者可能無法收回部份或全部應收款項。結構性產品價格可急升或急跌，投資者可能會蒙受全盤損失。過往表現並不反映將來表現。牛熊證備強制贖回機制而可能被提早終止，屆時(i)N類牛熊證投資者將不獲發任何金額；而(ii)R類牛熊證之剩餘價值可能為零。投資前應了解及自行評估有關風險，並諮詢專業顧問及查閱上市文件内有關結構性產品的全部詳情。UBS Securities Hong Kong Limited為結構性產品之流通量提供者，亦可能是唯一報價者或巿場參與者。©UBS 2026。版權所有。
