今日 12:09
噚日無睇指數，走咗去睇咗SPDR金ETF(02840)，皆因國際金價創咗新高，所以硬追隻(02840)，直入ETF可以，而用返有槓桿嘅S金Call(19404)亦都得，反正呢注都未必可以做到Day Trade。
嚟到今日平安夜半日市，恒指今朝開升5點已經none of my business，皆因睇住嘅係隻(02840)點走，托賴今朝升15蚊後，及至開市有見再上見依家9點38分升咗24蚊，報3234元，噚日隻(19404)都有見輪價高走。
但留意如果你手上有Call/Put在手的話，因為嚟緊係四日嘅假期，你放假港交所放假，但唔等於所有Call/Put都停頓，因為窩輪係有時間值損耗呢件事，而放假嗰四日，時間值損耗係存在的，因為日子真係有過到。所以，唔該，拜托，求下你，放假之前望一望你隻窩輪(如果有嘅話)，睇一睇個到期日一般到期前大約三個月開始，時間值損耗會開始加快；去到得番一個月，甚至一個月都沒有嘅，時間值損耗快過更年期變老。
講真架，真係睇完呢篇文之後唔該你去睇一睇啲用嚟做中線策略嘅輪；至於隻(19404)係2027年1月初先到期，所以(暫時)係無呢個問題出現，當然啦，唔過四日長假期嘅話，(19404)先食亦都係可以。
預祝各位聖誕快樂！與愛你同你愛嘅人過一個溫暖嘅節日！(下週一見)
作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。
直接去Patreon搜尋「cbbcwar」領取七日免費試用即市作戰教室
上一篇：輪證贏家丨續往熊證街貨走?!
