2026年10月30日
美企最新業績表現參差，Alphabet令人失望，抵消美國第三季經濟強勁增長，美股周四受壓，道指低開388點，見52086即市低位，收市跌幅收窄至132點或0.25%，報收52342；標指一度下滑0.68%，扭轉過去3日升勢，收市跌幅減半至0.31%或23點，報收7720；納指一度跌1.87%，收市跌365點或1.38%，報收26184。
個股表現中，Alphabet上季核心的網上搜尋業務收入遜色，觸發受AI衝擊擔憂，GOOG股價收市破紀錄插水12.6%，為跌幅最大道指成份股，市值蒸發4790億美元，折合約3.75萬億港元，阿Man就上一個交易日盤後止蝕咗310，目前股價喺280呢啲位，3月低位270亦係今年低位，諗緊要唔要撈返一注，但都係想睇定少少。INTC仲有85嘅貨，同樣因為盤後出績，早盤定個88止蝕盤，又係瞓醒就無晒短炒嘅貨，盤後由92急插到70邊先識得停，夜期喺71附近無乜動靜，但個業績又唔係差得好緊要，至大鑊係公司嘅第四季業績展望遠低於市場預期，股價盤後急跌逾兩成，誇張到連250MA都穿埋，阿Man中午擺咗個買盤喺70，執筆之時未接到貨，呢啲位買博250MA係假穿，上得返都見77，用個65做防守位，值得博下。
MSFT本來用528止賺，但睇真啲條50MA喺512，將個止賺盤改咗去510，穿埋50MA都係要落車。至於DELL用450-460做防守，中間落墨放咗個止盤455，又係盤後瓜老襯，暫時穿咗470條100MA，唔企返穩470，都危危乎。MU中返半注910，另外半注買盤放咗喺880，中晒就用850做防守。NBIS受拖累，盤後又跌穿返170，150-160嘅防守位仲頂得住。ALAB喺270買返嘅貨暫時無乜大礙，不過下周二公布季績，見到幾隻重磅AI股業績後爆晒缸，都要擺定個250止蝕盤，有唔對路跳車保命。SPCX喺151有一注，另一注改咗去139，因為想拉均價去145左右，再用個130-135嚟做防守，盤後中埋139，夜盤做緊140，止盤擺定130。MRVL以為220撈返無問題，結果盤中又插水，另一個買盤200未中，總之都係180做止蝕，真係隊爆個200落埋180止蝕都要投降。MRVL收購LITE未落實，945中注半注，用返個930做止蝕，因為20MA喺934，再穿先撤退，結果擺低返些少，見盤後落到900樓下，忍唔住880撈返半注，另外半注擺喺840，5、10同100MA分別落在835至868，同樣係下星期公布業績，用個830做防守，一旦落實收購，可能有一下急彈上去900樓上。
阿Man知道唔少人認為美股下下止蝕好難搞，寧願坐定定等甚至溝貨，但呢個並唔係阿Man嘅style，長倉唔郁因為喺美股已累積巨大升幅後，早期買盤嘅貨減咗磅後已免本，當然可以經得起震盪，但短炒就係短炒，始終要有止蝕同止賺，加上美股喺高位，總不能放任唔理，炒股都係為贏錢，紙上富貴無意思，錢要落袋仲要花得其所先有用。
美國經濟分析局(BEA)公布，當地第三季國內生產總值(GDP)以年率計增長，從第二季2.2%加快至3.4%，增速為一年來最快，並優於預期升3.2%，今次係美國下周二中期選舉前最後一份重要經濟報告。白宮經濟委員會主任Kevin Hassett於霍士財經訪問中表示，美國經濟朝向4%增長，通脹與預期相若，同時表示尊重聯儲局獨立性，並高度讚賞主席沃爺。美國10年期債息一度回落12.8個基點，至4.923厘，對息口較敏感嘅2年期債息下降13.1個基點，至4.604厘。美滙指數一度反覆轉挫0.26%至101.93，日本央行周五公布議息結果，日圓曾漲0.15%，至157.6兌每美元。市場觀望避免美國重啟對伊朗攻擊，紐約期油曾挫2.91%，低見每桶99.79美元，收市跌0.76%報102美元；布蘭特期油回落0.38%，收報114.88美元；現貨金價一度跌1.53%，亞洲時段更跌穿4000美元。
至於港股噚日23000又得而復失，當全世界以為外圍市場冧晒檔，夜期噚晚竟然反彈上返去23100水平，今早恒指高開52點，報23011，早段A股同外圍都死死吓，淡友以為得米，大市一度倒跌10點，低見22947後喘穩，但唔穿噚日低位即迅速收復23000失地，其後拾級而上，一直企穩個23100後升幅逐步擴大，最多升409點，高見23367。恒指半日升377點或1.64%，報23335。大市半日成交1070.55億元，雖然北水淨流出30.27億元，但無礙好友反擊。今日呢個情況，挾淡意味甚濃，預計23400呢個阻力無咁易企穩穩。不過挾得淡倉有冇咁快收手就好難講，下半場同收市恒指企到喺23200樓上，下周進一步上去補一補23500-23600下跌裂口無話唔得。只係港股本身弱不禁風，留意補到裂口都仲有條20日線係銅牆鐵壁，淡友應該會擋到實一實。總之企唔返穩條20日線，阿Man都只視之為跌市中嘅反彈。完成短線反彈，一旦再重返23500下跌裂口底部之下，唔排除11月又要經歷另一輪震盪，順手探底做埋個年波幅。
麥狄文
(徐狄怡‧證監會持牌人)
