2026年10月23日
美股個別發展，人工智能(AI)相關股份雖然業績交到數，但市場仍憂慮AI投資或遇障礙，發展持續性成疑，相關股仍要捱沽，加上地緣政治風險升溫，傳統股成為避風港，美股周四個別發展。道指低開67點後，跌幅曾擴大至347點，低見52508，其後反覆靠穩，收市道指升11點或0.02%，報52867；標指跌93點或1.21%，報7663；納指盤中曾跌近3%，收市跌694點或2.6%，報26008。中東局勢持續動盪，紐約期油最多升3.11%，高見每桶100.17美元，收報99.47美元，仍升2.39%；布蘭特期油升4%，收報113.17美元。
META以為680唔死得，一開市就中咗個止蝕盤，但見條50日線喺662，另外100日線同250日線分別喺630同635，決定再接再厲，喺650同630分別擺咗買盤，暫時中咗650一注，630等緊，若然中晒兩個盤，用600做防守，阿Man呢鋪要報仇。明明META上季業績顯示AI投資已有回報，業績亦超預期，但資本開支預期增加，就成為沽貨藉口，睇返META嘅估值，600-650呢啲位又唔算貴，去到50日線、100日線同250日線，值得博下。GOOG完全係衰貪心，噚晚又跌3%，短炒貨留咗一半無走，打回原形不特止，噚晚已去到320個防守位，以圖論圖乜嘢平均線都穿晒，其實都幾肉酸，兩個交易都唔識彈返去340，都要走咗啲短炒貨，至於長線持有嘅貨，成本只係拉到250亦唔算平，都要打醒十二分精神。INTC先係離晒譜，98無狠心走晒啲貨，手上仲有95同92嘅貨未走，噚晚穿埋90，仲要去到條10周線87附近，85加多一注，拉均短炒貨均價90.7，暫時仲要艇住幾蚊雞，又係睇多一兩日，再上唔返90樓上，唯有認輸。
NBIS本來232均價食晒糊，又係貪心喺190均價上返車，噚晚又倒水一下就殺到去條250MA大約係160，呢個位又係要博下，把心一橫160買多注，用150做防守，博佢有反彈。不過同GOOG一樣，圖表走勢頗為惡劣，兩個交易日都上唔返185條10MA，走為上着。DELL又係死唔肯走晒500，結果470忍唔住落車先。但見早段頂得住，465同450又擺返買盤，一覺瞓醒又中晒，盤後見450穿咗個心離一離，至夜期守返個450逐步回升，今晚望佢彈返去條5MA同100MA，即係460至465。SPCX喺150上咗車，仲有個買盤140未中，用個130大約IPO價135做防守。MU接返880同860兩注，盤後一度低見840左右，嗰刻心諗有冇搞錯連條30周線都穿埋，都要有走佬準備，本身係用個820-830做防守，幸好夜盤上返872，真係一額汗。本來MU個上落區間係880-1030，依家似乎要拉低一級，變成830-980。依家個短炒倉，得返MSFT仲有利潤，但520個止賺位夜盤失守咗，唯有睇埋今晚乜嘢環境，千祈唔好贏變輸咁笨。
資金避險，債市急升，美國10年期債息相應曾跌21.3個基點，低見4.936厘；息口敏感嘅2年期債息亦跌19.4個基點，至4.629厘。不過法國局勢動盪，法國債券續遭拋售，法國10年期債息再升19基點，與同年期德國債息差距一度擴大至1.78厘，為2011年底歐債危機肆虐以來最大。美滙指數曾升0.1%，報101.88，其後一度回吐0.32%，至101.45；日圓最多升0.92%，高見156.69兌美元。之前美股開始回調低因為債息扯高，家下因為避險個債息已落返唔少，睇下呢兩日美股會唔會定返啲，慢慢整固完再上。
昨日港股急跌，有消息指內地投資者要沽貨交稅，噚日係最後期限交條數出嚟，淡友借機發難，大市低開後跌勢極速擴大，恒指低開138點見23513已為全日高位，低開低走跌勢持續，一度跌772點低見22879，收市跌717點或3.03%，報22934，失守23000心理關口，成交額增至2560億，沽壓增加，但同樣可視為呢個水平開始有資金肯接下貨。至於北水持續碌得淨流出，昨日更錄得淨流出92.18億元，已連續七個交易日持續碌得淨流出。近日港股走軟，除咗係有關內地富豪被追稅，逼住要沽貨套現消息持續發酵之外，北水可以話係港股最後一根稻草，連北水都一改過往愈跌愈買，反而狠狠地沽貨，港股自然易跌難升。不過港股已呈超賣，短線有技術反彈亦唔出奇。
雖然美股噚晚納指顯著下跌，但夜期反而逆勢向上，反彈逾百點，重上23100水平，今早黑期亦於23100水平徘徊，恒指高開93點，報23027點，重返23000水平，但淡友一開波又嚟料，大市升幅迅速蒸發，且一度倒跌130點，低見22803，剛好逼近噚日加注嘅重牛區，但竟然22800嘅牛命仲保住，似乎係有期指淡倉開始平倉買返轉頭，大市喘穩並收復失地，最多升148點，高見23083點。恒指半日升132點或0.58%，報23066點，兩萬三關口失而復得。大市半日成交1256.48億元，北水淨流出71.18億元，已經係第八個交易日錄得淨流出。
港股三日急跌逾千點後，超賣見反彈好正常，但能否企穩持續反彈則仍有疑問。尤其噚日雖然急跌下，已回收逾4000張期指嘅牛證，但昨日散戶普遍再博反彈，由22500-22800水平大量牛證街貨增加，唔排除略為反彈後，再度回復跌勢向下劏牛，投資者對反彈未宜過份樂觀。今日期指留意23000-23050能否企穩，企穩反彈料23200為首個阻力，而23300-23350/23400阻力更大，如果企得穩23400先有條件上去補返噚日個下跌裂口，咁啱條日線已下移至23550水平，料23550-23650為反彈最大阻力。至於下方今早個22800成為短線支持，再下破22800恐怕22500前底難保。
麥狄文
(徐狄怡‧證監會持牌人)
