2026年10月22日
今日藍籌近乎全線下跌，唯一逆市上升嘅只有一隻美的集團(00300)，收93.60元，升0.54%，另一邊廂騰訊(00700)跌2.89%、網易(09999)跌6.53%、快手(01024)跌4.49%、小米(01810)跌3.73%，寧德時代(03750)更跌7.24%，近期大熱嘅長飛光纖光纜(06869)更大跌11.79%，華虹(01347)跌9.46%，內銀方面A股工行(601398.SH)曾破頂，港股內銀卻照跌，只係跌幅輕微過科網，並未能逆市造好。
中東區勢升溫
中東風險升溫，美國下令駐沙特非緊急人員撤離，市場憂油田同機場再受襲，將使油價一升、通脹預期就跟住上，聯儲局就更唔敢鬆手減息， 隔晚10年美債收5.119厘，今日亞洲時段雖回少少但仍企5.08厘樓上，呢個位等如「無風險回報都要5厘」，科網、半導體、大模型呢類靠講前景為賣點作定價嘅股份，自然成為淡市拋售對象，內銀唔靠講故事撐價，普遍息率近5厘、派息穩、波動細，就成為跌市入面「相對跌唔落」嘅選擇，不過港股內銀收市照跌，說明唔係有資金願意追入，只係暫作避風塘效應。
無北水易跌難升
真正放大跌幅嘅係北水，昨日淨流走44.35億，連續6日流出，今日再淨流走92.18億元，係9月7日以來單日最高，更關鍵係流向唔係「由科網沽咗搬去內銀」，而係直接縮倉，中芯淨流出9.11億、藥明生物淨流出6.42億、騰訊雖獲淨買入4.89億，但撐唔住大市拋壓，翻查10月初北水已撤離硬件設備同半導體，中芯、長飛先被點名減持，過往北水「愈跌愈買」嘅慣性今次一反常態，連三季業績將近嘅內銀都未見有加倉，策略上要油價回落、10年美債息明確跌穿5厘、最緊要見北水由淨流出轉淨流入，內銀只宜小注做倉底，暫時未可當主流追，今次跌市係債息同北水，內銀只係陪跑嘅避風港，美的集團今日有得升，唔係因為市場突然鍾意咗家電股，而係資金暫時唔敢留喺雲、留喺芯片、留喺「靠講前景」嘅板塊內，內銀今日似企得住先，亦唔係贏家、佢只係高息環境下同避險情緒下，被挑出來暫泊嘅地方，等到債息回順、油價唔再挾高通脹、北水肯回流嗰日，內銀會否即拋人落海係無人答得到，所以只可小注怡情做倉底！
梁健雄
筆者未持有上述股票
電郵:[email protected]
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
