2026年10月15日
今日恒指、國指均下跌1%，而科指就跌2.7%，人工智能、芯片、光通信、電商平台成條科技鏈條集體腳軟，唔少股份跌一成兩成，同一時間內銀卻逆市造好，農行(01288）、工行(01398)股價更破頂創新高，今日市場消息不是特別多，而係美債長息高引致資金追高息股！
債息高資金暫泊內銀
美債息高大家願意放錢在近乎無風險美債收取高息，令科技股因賺錢未算多，派息未算高，而且很多仍在燒銀紙階段，資金持有該類股票，變相於高息環境就變得估值昂貴，內銀息率近5厘上下、派息又穩定，股價雖然慢，但勝在企得穩，資金自然泊過去避一避風頭，今日唔係內銀特別叻或有什麼利好消息，而只係夠穩、夠息而已，自然成為暫時避風泊位之選。
業務未轉壞 現金未斷
美國9月非農只增2.9萬，遠低預期8.4萬，失業率由4.1%微升至4.2%，時薪升幅放緩，而招聘方面雖然唔見裁員潮、但招聘明顯轉冷，但次季GDP仍上修至2.2%，消費同投資未壞，市場預測美國加息或減息都係一半一半，策略上不建議見內銀破頂就追，畢竟再追上望空間太小，反而現時科技龍頭跌得急，但業務未見變壞，現金未見被斬斷，可以留意美債息回順訊號時，開始分注考慮返科技股。
另外A股北方華創(002371.SZ)、中微公司(688012.SH)、中芯國際(688981.SH)三隻不約而同今日下午交易時段2時25分見資金接貨，三隻更齊齊抝腰回升，GX中國半導體ETF(03191)頭幾大持倉正正係這類設備同代工龍頭，三隻已佔組合25%，另外盯緊寒武紀(688256.SH)、長鑫科技(688825.SH)、海光信息(688041.SH)、兆易創新(603986.SH)股價走勢，若隨後出現有成交有反彈，加上半導體行業屬國家重點支持，ETF股價已回落到60-70元範圍可以開始留意，今日內銀頂住唔代表永遠領先，息口一轉資金就會轉投返科技股。
梁健雄
筆者未持有上述股票
電郵:[email protected]
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
