2026年9月17日
昨日特區政府公布首份五年規劃，正式接入國家十五五規劃，內容講明要做強國際金融中心、全球離岸人民幣樞紐，優化互聯互通、推人民幣櫃枱納入港股通，對港交所(00388)而言，呢個就係「天時」、國家要金融開放、人民幣要走出去，而「地利」、香港有全球最大離岸人民幣資金池，又有滬深港通、債券通、互換通做通道，到「人和」、監管機構、交易所、銀行、發行人全部齊再加產品，三個條件一次過集齊，港交所可謂食盡天時地利人和。
平台一早搭好
更重要係，港交所唔似創科、製造業嗰類行業，要買地建廠、研發十年、產品又要反覆測試，隨時等到頸都長都未落地，港交所一早已經齊備「聯交所、期交所、結算所、人民幣雙櫃台、滬深港通、債券通、互換通」，樣樣都係現成，政策一放寬、產品一加入，交易費、結算費、上市費、數據費就即刻跟住嚟，呢種輕資產模式，唔使先比錢買地又比錢起廠，唔使等技術成熟，邊際成本低、見效快五年規劃話做人民幣樞紐，港交所根本唔使由零開始，收費系統一早已經搭好只等待時機。
貨幣市場路線圖
再講美元不穩，近幾年美債、制裁、財赤搞到「持美元不一定安全」這個現象，市場講去美元化、講資產分散，人民幣資產變成非美元配置其中選項之一，梁鳳儀都講，固定收益同貨幣市場路線圖，就係接非美元資金買人民幣債、做回購、做對沖，債券通北向成交創高，港交所仲同外滙交易中心搞新FIC電子平台，美元不穩，國際資金已經不想全揸美債，就會分一部分買人民幣債、買港股、買黃金、買國債期貨等，呢啲要離岸做、要自由兌換、要國際合規，全球最方便仲係香港，錢一進一出，港交所交易、結算、上市、數據全部有錢收。
逢低吸納
港交所暫唔講市盈率、唔講賬面資產，只講邏輯，港交所係香港唯一交易所、壟斷結算同上市基礎設施，賺嘅係全市場成交量同政策開放度，若信十五五互聯互通繼續擴大擴闊、人民幣產品繼續多、中東中資AI股繼續來港，港交所收入係跟「國策流量」走，並非跟單一行業景氣走，相對呢種無競爭、有政策護航、又有政策紅利，有成交彈性嘅生意去邊到搵，中長線前景絕對不俗，但畢竟規劃仍需落實執行，並且非常看港府官員的執行能力，至於買入時機就逢低吸納！不宜單注全壓落單次規劃消息！
梁健雄
筆者未持有上述股票
電郵:[email protected]
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
