2026年8月20日
全球長債近日遭大舉拋售之際，美國財政部出乎意料地宣布，將長年期國債回購操作規模擴大至少一倍，長債孳息急回，並帶動美股周三反彈。美國財長貝桑去年啟動國債回購計劃，當局有需要時解決美債市場錯置。法盛(Natixis)北美洲美國利率主管John Briggs認為今次主要係向市場傳達訊息，如果債息過高，財政部會嘗試阻止。其實以目前美國債務高企，債息維持高位實在吃不消，當局遏止債息必然嘅事。美國10年期債息一度回落7.5個基點，至4.631厘；30年期債息回落10.2基點至5.183厘。道指高開120點後，升幅擴大至最多366點，最高報53710，收市收窄則收窄至119點或0.22%，報53463；標指升16點或0.21%，報7707；納指反彈41點或0.16%，報26331。不過聯儲局於香港時間周四凌晨公布嘅7月議息紀錄顯示，大部分官員表示，除非喺降低通脹方面取得更多進展，否則聯儲局好快需要提高利率。
焦點股方面，SPCX股價續回落2.6%，蘋果公司則升2.2%。SK海力士SKHY宣布回購40萬億韓圜股份，其ADR股價彈高5.3%後回順，收市僅升0.4%；其他AI相關股份早段仍然受壓，不過盤中至支持位有買盤趁低吸納。MU按計劃喺940中咗止蝕盤，再望返條10MA同20MA，本來900嘅買盤分別改去920同890擺返兩個買盤，繼續用880做防守止蝕，結果中返920 注，收市上返937，總算守到10MA，盤後同夜盤進一步回升至953水平，先以50MA即962做目標。至於DELL開市上過10MA，可惜僅曇花一現，一開市就插水，440嘅止賺盤開市無幾耐畀佢KO咗。見50MA喺425，索性428撈返一注，5%止蝕，阿Man對DELL前景有信心，要上返500問題不大，呢隻一直係阿Man重點關注嘅股份。MRVL兩注227同217嘅貨持有，207當然係無影，呢個GTC買盤繼續擺，股價上得返50MA，下個位望佢企返250樓上。ALAB都係按計劃喺283-288上車，283中咗一注後，288加多注，平均價285.5，剛好係100MA，用噚晚低位278做防守，博佢條平均線打返上去，目標310/350，睇下報唔報到仇。
QNT又係出師不利，彈唔返上61，10MA企唔返，一樣係57個止蝕中到應一應，但阿Man講過，止蝕要嚴守紀律，到價即斬唔會猶豫，寧願買貴都唔買錯。NBIS止盤220到價走人，不過見20MA守得住，有少少唔忿氣，215撈返，呢一注用210止，連20MA都穿埋無得再拗頸。噚晚NQ都幾好炒，開市後企到個29500分水嶺好倉上去，29700企唔穩落車，都有百幾二百點。今晚NQ分水嶺29600，支持29500/29400/29300/29200，上方29700/29800/29900/30000。
昨日港股好淡爭持，恒生指數低開124點後，曾低見25315低位，雖然A股跌勢顯著，但港股並未有跟隨，中午港交所(00388)公布業績收市創新高，派息更按年增加24%至每股中期息7.43元，刺激股價急升，帶動港股收復失地，最終恒指倒升23點，報25495，連升三個交易日，成交額2531億元，當中北水錄得淨流出106億元為超過四個月以嚟最大單日淨流出。不過至夜期時段，因美國財政部出乎意料地宣布，將長年期國債回購操作規模擴大至少一倍，長債孳息應聲急回，並帶動美股周三普遍反彈，夜期跟隨美股反彈續升，夜期更至25700水平，一口氣收復10日線及20日線，更重返50周線及高見250日線，上到去25700水平。
今早黑期於25700水平徘徊，恒指裂口高開284，報25779，不僅收復10日線(25542)及20日線(25588)，250日線(25754)。最多曾升312點，高見25807，高位遇回吐，升幅一度收窄至137點，曾低見25632，其後250日線爭持；好友呢期有優勢，半日升291點或1.14%，報25786，企返穩250日線。不過港股喺25000至26000呢一段，一直未能做到價量齊升，大市半日成交1441.06億元，北水淨流出8.02億元，始終25800至26000呢個位阻力大。
今日恒指裂口高開，半日僅回補部份裂口，仍遺下25537-25632近百點裂口未回補，加上已收復250日線，如能企穩250日線，有望進一步向上挑戰25800-26000成交密集區。相反，如今日僅挾沽空淡倉，及獵殺熊證重貨區後，無法企穩25700水平，甚至重返20日線水平之下收市，則港股將繼續調整，後市料再考驗100日線及下探50日線機會大。留意今日阿里巴巴(09988)公布業績，如市場滿意其業績表現，有助帶動其他重磅科技股回升，為港股向上挑戰26000水平助力；不過近日多隻科技重磅股業績後均見光死，一旦阿里業績後有樣學樣，港股則反彈至此又行人止步，港股後市可以話成也巴巴，敗也巴巴。
麥狄文
(徐狄怡‧證監會持牌人)
