2026年7月30日
7月30日恒指收25858點，升0.2%，大市總成交3048億元，但恒生科技指數跌1.3%，回看7月份市場其實用腳投咗票，科技股調整、藍籌股接力，舊經濟已悄然抬頭，恒生金融分類指數20日累漲13.17%，幾乎與恒指同步爆發，今日內銀股再度集體抽升，農行(01288)升3%、工行(01398)升2.1%、中國光大銀行(06818)升2.8%，另多隻內銀H股更齊齊創新高。另受惠中東局勢升級同布油重上90美元，中海油(00883)升2.9%、中石油(00857)升2.2%，無論係快將公布業績的公司，或內銀股與油股，這些股份都有一個共同特徵，「市盈率低、現金流穩、業績可期」，而且估值唔貴，資金明顯唔再聽故事，要搵有股息派嘅企業。
業績期前哨戰
下周踏入8月，市場主角已唔再係「AI敍事」同「估值擴張」一類，而係轉移到「用業績衡量估值」的業績公布期，8月4日由創科實業(00669)打頭陣，到8月12日騰訊(00700)、8月14日紫金黃金國際(02259)、8月17日吉利汽車(00175)、8月19日港交所(00388)、8月20日中國平安(02318)、8月21日紫金礦業(02899)等，一連串中期業績將於8月揭盅，換言之8月份港股，係一個「用盈利驗證估值」的月份，中金公司預計，其覆蓋嘅銀行股2026年二季度營收同比增6%、歸母淨利潤增4%，中期業績將延續向好趨勢，國泰海通亦指出，需要等待8月中旬港股上市公司中期業績報告來驗證基本面情況，這就解釋咗點解7月下旬以來，資金由炒過龍次新股轉移去舊經濟股，因為後者嘅業績確定性高得多。
18C估值消化 舊經濟成主流
市場上現時一批18C次新股估值，建基於「市場稀缺性」敍事，確實長遠仍有投資價值，但近期估值已透支未來太多太巨，7月份已證實被炒過籠的次新股，待8月下旬至9月初將密集公布業績，到時候先係真正考驗估值，到時誰家企業過到呢一關，將逐一反映出誰家有「實質收入、實質盈利、實質現金流」的新經濟股，散戶到時慢慢挑選都不怕遲，切記上面蟹貨重重，合理估值還待逐一消化亦需一段頗長時間，8月開始將係睇業績、睇盈利的一個月份，舊經濟憑住低估值、高股息、業績可期，而將成為市場的主流。
梁健雄
筆者未持有上述股票
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
