昨日 13:03
美國聯儲局周二展開一連兩日議息會議，議息結果將於香港時間周四凌晨公布。美股隔晚喺油價回升下，科技股受壓，標指及納指均從紀錄高位回落，道指漲逾200點後倒跌。美市收市，道指回吐25點，報49141；標指跌35點或0.49%，報7138；納指跌223點或0.9%，報24663。
美伊談判未見進展，霍爾木茲海峽繼續遭封鎖，油價回升，紐約期油更一度重越100美元大關，雖然阿聯酋突然宣布退出石油出口國組織(OPEC)消息令油價升幅收窄，回落至約99美元，但油價仍然高居不下。油價高企令美股受壓，標指及納指均從紀錄高位回落，道指曾升逾200點後倒跌，不過睇返啲重磅股嘅表現，回吐壓力又唔算好大。留意今晚聯儲局喺香港時間兩點左右公布議息結果，都預咗息率維持不變，要關注係議息聲明講啲乜，油價高企下，會否令今年預估減息一次嘅機會都無埋。
Nvidia股價一度急跌3.9%，收市跌幅收窄至1.6%，暫時睇住個200-210嘅支持力度如何。NBIS觸及135美元至140元回補位，穿咗140，短線支持130，今晚睇下撈唔撈返163美元沽嘅一半貨。除咗NBIS止賺咗，TSM順利升抵目標價400美元，320撈嘅貨，有25%利潤，慣性操作減返半先，另一半等有冇回落至375-385再睇睇支持力度如何，考慮回補。MU盤中曾回落至489美元，收市去返504.29美元，盤後又上返519美元，可見資金係見有急回就接貨，持貨者亦惜貨如金，但阿Man仲未有所行動，想等480美元附近，誰知又一下彈返晒。ONDS同RDW得個等字，守到支持位就坐住先。ALAB順利回到180-185元啲撈貨位，排隊中返180/185美元，原來咁快就接到貨。CRWV守到100，但穿咗110，呢個情況值得關注，盤中曾去返103美元，係之前撈貨位嚟，今晚守到100就加返啲，守唔到考慮走埋另一半算數。NQ噚晚做回吐，落到27000附近就有支持，即係去到噚日最後一個支持位27050就發揮效力。今晚NQ個好淡分水嶺27250，支持27150/27050/25950，阻力方面27350/27450/27550。
至於噚晚夜期及ADR早段曾跟美股繼續回軟，但最終靠穩並略為回升，今早黑期回升逾百點，重上25800水平，今日期指結算日，加上極短線技術指標呈超賣，唔少重磅股及恒指RSI 2均跌至10以下水平，開市前已預估港股今日或有反彈，表現唔會太差。結果恒生指數今早高開162點，升幅一度擴大至371點，半日高見26051點，中午收市升330點或1.28%，報26010。國企指數升122點或1.41%，報8767；科技指數升52點或1.08%，報4879。半日大市成交1330億元，成交就唔算配合到逾300點升幅。
咁啱今日期指結算日，大戶喺期指上部署活動，暫時凌駕消息面，令港股喺紐約期油再度逼近100美元下不跌反升，不過噚日恒指跌穿20日線後，今日隨即收復失地，25800呢個20日線位都係假跌穿；短期港股仍未改上落市格局，仲喺25500-25600條50周線左右有不俗支持，但上方26100條100日線未企返穩，本周又有個長周末，或者等下星期返嚟，先會有更明確方向。
麥狄文
(徐狄怡‧證監會持牌人)
