2026年3月19日
伊朗戰事升級刺激國際油價再度回升，並引發全球通脹重燃憂慮，美國聯儲局一連兩日議息後，宣布聯邦基金利率目標區間維持於介乎3.5厘至3.75厘，符合市場預期。最新利率點陣圖顯示，官員料今年底利率中位數為3.4厘，暫時與去年12月一致，意味年底前減息一次，幅度為0.25厘。由於中東戰火愈演愈烈，油價再度回升，喺議息結果前，道指已跌超過500點，議息時跌勢持續，其後聯儲局主席鮑爺喺記者會表示，通脹控制進展不符預期，主要因為中東戰事未明朗，內部已開始討論加息可能性。
鮑爺咁講等同放鷹，拖累道指跌勢加劇，一度急瀉800點，低見46193，創今年新低。美聯儲表示喺評估適當貨幣政策立場同時，會注視新資訊對經濟前景啟示，若浮現妨礙實現政策目標風險，即係局方最關注嘅通脹，隨時準備調節政策。市場解讀較為悲觀，開始有意見表示，一旦油價持續高企，估計今年不僅未能減息，息口更有掉頭向上風險。
早兩日阿Man已表示暫時美股倉位唔郁住，主要mon住組合內股份，守唔守到啲防守位，暫時之前有提到嘅股份，表現尚算唔錯，即使美股隔色三大指數都跌逾1%，但提及嘅股份，只見輕微回落，而提咗可以落一落車嘅ONDS，一如預期上到11.5至12元就見阻力回落，11.5食一食糊先，今晚再睇下係咪可以喺10.5至10.8元撈返貨，都係開咗市，視乎市況再決定。RDW就上到10.28回頭，暫時又落返9.55水平，要留意呢一轉8.8-9元不容有失。NBIS反而急跌後有反彈，115係可以買返一注， 不過基於美股近日走勢麻麻，今晚再睇下115企唔企得穩。
至於NQ噚晚上到25250無以為繼，穿埋分水嶺25050後直線插水，連24750都穿，去到24550先見支持反彈。今晚個分水嶺睇住個24650，上方反彈阻力24750/24850/24950-25000，下方支持24550/24450/24350-24300。
港股昨日重越二萬六關，連續第三個交易日反彈，恒生指數高開54點後，早段曾隨A股走軟倒跌76點，低見25791，午後見買盤吸納，一度回升249點見26117高位，其後升幅收窄至156點，報收26025，但成交額只有2403億元，成交唔算活躍。不過至夜期時段，國際油價再度回升，雖然美聯儲局維持息率不變，但主席鮑爺表示能源價升推高通脹預期，加上中東戰事升級，拖累美股顯著下跌，道指跟標指更齊創年內低位，港股於夜期亦隨美股急挫近2%，夜期跌穿25500水平，ADR更插升至接近25300水平，黑期則於25400水平徘徊。
受累外圍股市向下與中東戰事升級，恒生指數今早裂口低開474點，早段跌幅曾擴大至522點，見25502半日低位，半日跌432點或1.66%，報25592。5日線及10日線得而復失，20日線更加一日都無企收過。國企指數跌115點或1.3%，報8720點；科指跌80點或1.57%，報5027，主要受騰訊(00700)及阿里巴巴(09988)等重磅科技股拖累。半日成交額1535億元，以今日半日跌幅嚟講，其實沽壓又唔算好嚴重。喺中東戰事未休止下，投資者傾向保守審慎，不加不減，令成交亦無咁活躍。
今早大裂口低開後，早段曾彈返啲去回補部份裂口，暫時現貨仍遺下幾十點裂口25737至25791，三個交易日上唔返25700-25800水平，後市偏淡。留意周二高位約26200水平，如要滿足1000-1200點周波幅，今明兩日有機會下試甚至跌穿周一低位，再度考驗250日線約25100水平。一旦跌穿250日線，則向下突破，展開更深度調整，25000-25100不容有失。反彈方面，料阻力重重，首個阻力為25750-25800，即5日線及10日線匯聚區，亦為上日低位，或由支持變成阻力，而26000-26050即20日線阻力更大。
港股能否扭轉弱勢，關鍵在於26000即20日線水平能否企穩，恒生指數至少要連續三日收高於20日線之上方能脫險。幸而目前成交維持於2000億元之上，反映仍有資金願意喺此水平收集港股，但中東戰事未明下，港股能守於25000水平之上已屬萬幸，如港股能守25000，則維持區間上落，上落區間暫於25000-26500水平。港股要突破向上，至少要企穩26500水平之上，並重返27000水平，方有條件挑戰前頂並創新高。
麥狄文
(徐狄怡‧證監會持牌人)
下一篇：炒股讀心丨港交所怪你過份美麗
