2024年7月26日
隔晚美國公布次季GDP較預期強勁，略為紓緩市場對企業業績欠佳嘅憂慮，美股表現反覆。道指衝高後回順，一度倒升584點，重越4萬點，但收市前大部分升幅都蒸發，收市僅升81點或0.2%，報收39935，4萬大關得而復失；標指最多漲1.19%，其後反覆回落，收市倒跌28點或0.5%，報收5399；科技股沽壓未除，納指曾跌1.78%，盤中一度倒升，但收市反覆受壓，跌160點或0.9%，報數17181。
雖然金龍指數續跌，但夜期跟ADR微彈，加上人民幣今早創兩個半月高位，港股一度反彈逾200點，可惜後勁不繼，更曾倒跌，再創三個月低位。恒指高開74點，早段曾升224點，見17229點半日高，不過未能企穩17200頸線，及1月低位至5月位回調黃金比0.5即17250遇阻，大市掉頭向下，曾倒跌80點，低見16924，創4月23日以來逾三個月低位，其後回穩。恒指半日收報17033，升28點或0.17%；國指跌4點，報6012；恒科指升22點或0.7%，報3443。半日成交額601.93億元，以周末前夕嚟講，半日有咁嘅成交額算唔錯，萬七邊似乎都有啲買盤博反彈。
科技股個別發展，攜程(09961)叫跌得最甘，半日再跌3.16%，網易(09999)半日跌1.69%，快手(01024)跌0.93%，美團(03690)跌1.19%；阿里巴巴(09988)跌0.07%。騰訊(00700)及小米(01810)分別升1.2%及1.85%。金融股方面，友邦保險(01299)升2.26%；大笨象(00005)升0.15%；中國平安(02318)無升跌；港交所(00388)跌0.09%。內銀股則普遍腳軟，四大內銀全線向下。至於中資電訊股跌勢亦顯著，聯通(00762)跌6.31%，係表現最差藍籌股，中電信(00728)跌4.49%，中移(00941)跌3.14%。內地推出家電以舊換新補貼政策，家電股有追捧，海爾智家(06690)升4.67%，係今日表現最好藍籌股；海信家電(00921)亦升逾半成。
喺日圓拆倉潮下，外圍股市震盪，港股雖然估值已平，但受氣氛所影響，港股亦難逃再跌命運。加上內地經濟未見起色，港股初步支持為17000點，但成交薄弱下，反彈力度亦相當有限，加上臨近期指結算，反彈亦可能受制17250及17500阻力。下月業績高峰期要視乎市場對企業業績如何解讀，方再見方向。
麥狄文
(徐狄怡‧證監會持牌人)
