2023年6月13日
隔晚美股喺聯儲局議息前造好，市場普遍預計6月唔加息，但7月就會加0.25%，今晚美國會出5月份CPI，睇吓呢個經濟數據對未來息口路徑有冇啟示。人民銀行就喺10個月以嚟首次下調逆回購利率，帶動港股先跌後回升，港股之前四個交易日喺無乜成交之下，乾升305點，今日情況無大改變。半日一度升逾百點，但暫時仍受制250天線(19582點)，但恒科指已重上4000點心理關口。
恒指低開48點，喺人民幣弱勢下，跌幅曾擴大至130點，見19273半日低位，但19200水平嘅支持不俗，大市止跌回升，掉頭向上升最多107點，見19511半日高位。中午恒指收報19482，升78點；國指升26點，報6612；恒科指升82點，升逾2%，重上四千大關，收4027。半日成交額略增至468.91億元，但整體交投仍然淡靜。
藍籌股普遍向上，友邦(01299)半日由跌轉升，倒升0.3%，但大笨象(00005)則下跌0.3%，港交所(00388)亦跌0.1%。不過ATMJ表現硬淨，阿里(09988)跟京東(09618)升逾2%，騰訊(00700)跟美團(03690)則升逾1%。AI概念股忽然又熱炒，其實美國相關概念股一路炒到出煙，相對港股呢邊已經算落後。百度(09888)半日升4.2%，商湯(00020)升6%，閱文(00772)更升逾一成，係表現最好科指成份股，就連美圖(01357)呢隻質地麻麻嘅AI概念股都升3.5%。
人行逆回購利率下調，加上部分房企恢復海外債券融資，內房物股管股又彈一彈，不過反彈力度唔算強勁，原因阿Man都唔想再講。有聲意話內房產業係L形反彈，其實看圖識字L形即係高位落去咗低位就橫向發展，真係唔多明乜嘢叫L形反彈，L形走勢頂多咪唔再跌囉。
油價下跌，石油股今早走弱，三桶油逆市下跌，全部跌超過2%，其他石油股及油服股亦腳軟。除咗石油股，鐵路基建股表現亦麻麻，中字股呢期炒唔起，不過又唔算跌得多，可以視為整固，橫行整固，睇樣又唔多似玩完。
恒指已企穩咗10天及20天線幾日，雖然成交一直唔多配合，但乾升一樣可以繼續挾上去，暫時19200有不俗支持，逐級調高支持位，今日如果能夠企穩埋19450之上，突破下降軌阻力，有機會繼續向上挑戰250天線及50天線。
麥狄文
(徐狄怡‧證監會持牌人)
