2023年5月17日
美國國會跟總統拜登未能就提高債務上限達成協議，財長耶媽警告時日無多，要盡快解決，加上Home Depot業績差過預期，股價走低，拖累道指下跌超過300點，標指跟納指亦走軟，標指又回到4100支持位附近。美股目前僅靠幾隻重磅科技股撐住，其他股份早已轉弱回吐，標指一旦跌穿4100支持位，或出現較深度調整。至於港股今早受壓，皆因人民幣今年以嚟首次跌穿七算，恒指半日跌逾百點，失守10天線(19911)。
恒指低開22點，跌幅隨即擴大，半日最多跌163點，低見19814半日低位，喺19800水平有小量買盤承接，大市止跌回升，曾倒升9點，見19987半日高位，但受制二萬大關，中午復跌百點收市，10天 、20天及50天線得而復失。恒指中午收報19867，跌110；國指報6763，跌25點；恒科指跌4點，收3954。半日成交只有424.41億元，交投繼續淡靜，市場氣氛薄弱。
藍籌股個別發展，科網股表現較佳，騰訊(00700)、阿里(09988)跟百度(09888)逆市上升，阿里跟百度半日更升逾1%。不過其他重磅股大笨象(00005)、友邦(01299)跟港交所(00388)全部走軟，跌0.7%至1.3%。中移動(00941)旗下雲產品減價，股價半日跌1%。內房股整體下跌，其實都唔意外，阿Man都講咗無數次，內房同物管股喺無辦法改善銷售問題，以及持續受債務問題困擾下，只會有波幅，無升幅，加上本身市場氣氛欠佳，市底弱，內房股呢啲本身有問題嘅板塊，資金要博反彈都未必揀佢哋。
金價回落至2000美元之下，金礦股受壓，金礦股跌幅由超過1%至3%不等，SPDR金ETF(02840)則下跌0.9%。生枓股亦走軟，藥明生物(02269)及藥明康德(02359)聯合創始人趙寧辭世，兩股齊齊跌逾3%。翰森製藥(03692)半日跌4.4%，成為表現最差藍籌股，而生科股中，康方(09926)半日跌逾7%，跌勢較為明顯。
港股咁嘅成交額，確係無嘢好講，氣氛淡靜，炒鬼都唔願入場，騰訊(00700)業績前炒上，呢兩日大量資金流入買騰訊牛仔，小心騰訊就算交出一份似樣嘅成績表，股價一樣見光死，高開低走，順便劏肥牛。
麥狄文
(徐狄怡‧證監會持牌人)
