2023年4月27日
美國一共和銀行（FRC）公布業績後，股價急挫五成後，隔晚未能止瀉再跌三成，市場再度憂慮銀行爆發危機，美股個別發展，道指喺銀行股表現疲弱下，跌逾200點，不過微軟公布業績後，股價造好，帶動科技股向上，納指反彈55點。港股今日係期指結算日，半日變動唔大，但未見承接噚日反彈勢頭，半日窄幅上落，喺250天線(19721點)附近游走。
恒指低開20點，跌幅一度擴大至94點，但受期指結算前轉倉活動影響，有心人托住指數轉倉，半日曾倒升61點，中午收報19733，升16點。國指跌12點，報6641；恒科指則跌32點，收3839。半日成交進一步縮水至482.89億元，睇怕全日成交額同噚日一樣，過唔到1000億元。
藍籌股半日個別發展，平保(02328)表現強勁，公司公布業績首季盈利增加49%，股價半日升6.1%，藍籌之中表現最好。相反招行(03968)季績差過預期，股價半日表現跟平保剛好相反，跌6.2%，成為表現最差藍籌股。ATMJ全線走軟，阿里巴巴(09988)公布旗下阿里雲要以減價搶市佔率後，股價今日繼續插水，半日再跌2.4%，盤中一度低見80.8元。
望返轉頭，阿里股價已幾乎打回原形，重返公布公司改革重組及計劃分拆嘅水平，口痕友話阿里吹風搞咁大單嘢，一度刺激股價重上紅底，畀咗個機會軟銀靚價減持，跟住股價就如瀡滑梯般拾級而下，散戶以為真高位追貨，又再中伏被割韭菜，咁嘅情況下，以後阿里發放乜嘢好消息都好，唔會有人再肯落搭。
至於美團(03690)、騰訊(00700)則分別跌0.7%及1.6%，京東(09618)跌至歷史低位後，反彈乏力，半日亦跌逾1%。友邦(1299)首季新業務價值升28%，股價升1.1%，連同大笨象(00005)都向上，兩者對恒指帶嚟支持，否則喺ATMJ齊齊仆直下，恒指半日無乜可能仲可以錄得升幅。
港股半日不足500億元成交，反映咗港股跌至二萬水平之下，仍未見有資金肯入場接貨，原因係外資撤離後，一去不回頭。中港經濟已重啟超過一季，但市道復甦不似預期，以本港旅遊業為例，內地訪客多集中低端消費群，參加低價旅行團為主，高消費旅客不復見，過往大手掃貴價貨嘅自由行旅行亦未見影縱。由於內地已不缺奢侈品供應，高端消費旅客可以喺內地尋找心頭好，又或到其他海外地區旅遊消費，都唔再嚟香港掃貨。近期更有大型國際奢侈品集團將部分品牌地區總部由香港遷往上海，可見香港喺外資眼中，已失去往昔嘅吸引力。
實體經濟復甦未如預期，加上國際地緣政治關係緊張，中美角力持續，通通對香港極為不利，試問咁嘅環境之下，港股又點會有運行。恒指已失守多條移動平均線，目前喺250天線勉強支撐，一旦再失，睇怕將重返1月低位19400水平，此關再失，將繼續向下尋底。
麥狄文
(徐狄怡‧證監會持牌人)
