2023年2月17日

【盤房來料】大市本周低位徘徊下周調整持續

美國PPI升幅超過預期，即使大型科企齊齊裁員，亦見未就業市場受影響，目前仍保持強勁，加上隔晚聯儲局官員放鷹，美國10年期債息攀上今年新高，逼近3.9%水平，美股隔晚受壓，三大指數跌逾1%，表現疲軟。港股半日則表現反覆偏軟，跌逾百點，又重返本周低位至20800水平。

恒指低開29點，曾倒升69點，見21056半日高位，無奈成交再度萎縮，喺成交支持下，易跌難升，恒指回復跌勢，半日最多跌169點，見20818半日低位。恒指中午報收20866，跌121點；國指跌38點，半日報收7051；恒科指半日跌63點，跌幅超過1%，跑輸大市，報收4303。半日成交額僅得441.45億元。

藍籌股跌多升少，ATMJ線走軟，騰訊(00700)半日跌0.8%；阿里(09988)半日跌1.5%；而美團(03690)跟京東(09618)半日則跌逾2%。自內地跟香港通關以來，未見零售市道特別受惠，周大福(01929)早在開關前炒上，通關後反而股價走弱，今日半場更跌近4%，成為表現最差藍籌股。三桶油逆市上升，資源股今日表現唔錯，中國宏橋(01378)半日升3.6%，成為表現最好藍籌股。

周末前夕，成交再萎縮亦屬正常，加上近日港股表現反覆偏軟，缸邊友更是無心戀戰，雖然噚日恒指一度收復10日線，但午後升幅大大收窄，10日線得而復失，更未能企穩21000水平，如此走勢，正如阿Man呢兩日所講，大市調整持續，只會易跌難升。調整目標仍然係50日線(20703點)及250日線(20076點)，亦順理成章回補上月所遺下嘅上升裂口20200。

麥狄文
(徐狄怡‧證監會持牌人)