2022年11月24日
隔晚美聯儲局公布11月議息會議紀錄，大部分委員認為息口快要見頂，喺通脹同時見頂下，加息步伐有望放緩，市場見息口有機會見頂，美股三大指數即彈，不過可能係世界盃效應，少咗市場資金參與，美股上升動力唔算勁，加上標指喺4100點阻力唔細，一旦升得穿兼企穩，美股就有機會由熊入牛，呢一點正正係阿Man對整體市場後市唔會睇得太淡嘅原因。
至於港股除咗美股向好之外，反映中國概念股表現嘅金龍中國指數反彈2.27%，港股噚日終止五連跌，反彈99點，今早一度升逾200點，但仍受制10天線(現處17780)。恒指高開160點，一度升235點見17759半日高位，其後曾倒跌6點，見17517半日低位。中午恒指升90點，收報17614；國指升30點，報5975；恒科指升23點，收3579。半日成交額縮到500.47億元，預咗世界盃效應下，成交會縮水。
藍籌股個別發展，ATMJ中，騰訊(00700)跟阿里(09988)分別升0.4及0.9%，京東(09618)半日跌1.6%，暫時喺200元水平爭持，至於明日公布季績嘅美團(03690)半日跌0.7%。由於騰訊大股東南非基金，講明收到美團嘅股份實物分派後打算有秩序地喺市場沽貨，令到呢期美團走勢較弱，但派送係明年3月底嘅事，啲人就有理冇理沽定先。金融股繼續造好，滙控(00005)升1.3%，中銀香港(02388)升2%，平保(02318)升近1%，友邦(01299)升0.2%明顯跑輸。
國常會指出要適時適度運用降準等貨幣政策工具，保持流動性合理充裕。另外，據報國有銀行向房企提供約2200億元人民幣授信額度，民企內房料可受惠，今日內房股跟物管回升。不過內房要解決問題嘅根本，係要靠銷售，要內房真正擺脫目前困局，始終要內地嘅房產市場回暖，但喺目前嘅防疫政策下，呢方面未見有起色。
話咗炒國企改革呢啲比較短癮，早兩日升嘅中字股，今日見回吐，最離譜係中鋁國際(02068)半日急回15.4%，追貨嘅又做韭菜被割。其他中字股普遍回落，跌幅由超過1%至7%不等。講真個市真係無乜好炒，就連指數波幅亦收窄，下周期指結算，睇嚟又要待結算過後，港股先有更明確方向，暫時喺50天線及10天線之間上落。口痕友話炒股不如賭波，咁又無錯，成交縮水，生意淡薄，不如賭博。
麥狄文
(徐狄怡‧證監會持牌人)
