2022年7月15日
隔晚美國繼續反覆，資金似乎由傳統股流向增長股，尤其係呢批股份已經過大幅調整後，有資金趁低吸納，令美股出現道指跟標指跌，納指升嘅現象。不過美股近日反覆不定嘅表現，再加上單日波幅日漸擴闊，令資金開始卻步，美股成交開始縮減，反映資金對股市戒心愈嚟愈高，資金逐步流入債市，令債息未至於喺通脹數字，及息率預期上升下，繼續急升。而長短債息更出現倒掛，令市場憂慮美國經濟衰退正升溫。
歐美經濟或陷入衰退，中國內地經濟亦唔見得有幾好，中國公布第二季經濟增長放緩至0.4%，低於市場預期增長1.2%；雖然數字公布後，A股曾倒升，但其後再度回軟，而港股喺重磅科技股跟銀行股受壓下，港股今早再度發軟蹄，連續四日跌近千點後，半日再跌逾200點。
恒指低開229點，跌幅其後收窄至94點，見20656半日高位，其後內地公布第二季GDP稍於預期，A股一度倒升，但其後回軟，港股亦一度跌332點，見20419半日低位，更創個半月新低。恒指中午報收20503，跌247點；國指半日跌85點，報收7040；恒科指跌幅達2%，半日報4496。半日成交額喺周末前夕並未見減少，半日成交額反而略增至664.98億元，反映周末前市場傾向減持手上股份。
藍籌股普遍下跌，《華爾街日報》指上海當局就上海警方數據庫被盜案件，約見阿里(09988)高層面談，拖累阿里股價半日跌近4%。騰訊(00700)則跌至三個月低位，半日跌2%，美團(03690)半日亦跌1.7%。銀行股表現疲弱，經濟情況轉壞，銀行股首當其衝。尤其內銀股更受停貸斷供事件所影響，表現疲弱。
不過汽車股今日脫穎而出，比亞迪(01211)發盈喜，預期中期盈利最多升2.07倍，遠勝預期，股價半日升近半成，藍籌之中表現最好。其他汽車股普遍上升，長汽(02333)亦預期上半年純利增長五成，但股價半日則倒跌0.3%。汽車零部件股表現亦佳，敏實(00425)升2.3%；耐世特(01316)升3%；力勁科技(00558)漲5.5%。
內房物管股繼續走軟，沽壓嚴重，市場繼續閞注內地斷供事件，雖然多間內銀表示目前風險可控，而中央對此亦表關注，將召開緊急會議，商討對策。但市場暫時對內房股避之則吉，唔再理會估值已極度低殘，寧願先沽貨再觀察。暫時無貨嘅都係靠邊站，睇睇中央呢次出咩招解決，再決定係咪要將資金押注呢個板塊內，財政健康嘅公司。
麥狄文
(徐狄怡‧證監會持牌人)
