2022年5月31日
美股隔晚假期，不過內地公布5月製造業PMI好過預期，港股兩日急升逾千點後，今早保持強勢，只係港股始終唔夠成交配合，上升動力有限，予人乾升之感。
恒指低開17點後，內地公布PMI數據後，大市掉頭回升，半日最多升135點，見21259半日高位，其後喺21200點水平爭持。中午恒指收報21215，升91點；國指中午報7321，升66點；恒科指半日收4431，半日升78點。半日成交額708.06億，唔算太多，始終嚟到21000水平，市場唔多願意再追貨，不過今日係MSCI再平衡，相關指數股成交量喺尾市將會增加，令到成交亦變相較呢幾日平均數多，但就唔可以視為有大量資金入市。
藍籌股個別發展，大笨象(00005)半日跌1%，內銀股普遍亦腳軟，反而保險股表現唔錯，友邦(01299)半日再升0.6%；平保(02318)跟國壽(02628)半日上升，不過升幅都好有限。至於港交所(00388)呢一轉就擺明弱過人，個市彈過千點，佢個股價就連340元都未上得返。
呢轉個市彈升逾千點，基本上主要係靠幾隻重磅科技股，雖然騰訊(00700)業績後表現麻麻，但龜速咁上返嚟350元水平之上；美團(03690)呢一轉就完全係領頭羊，集團將會喺周四派季度業績，業績前由150元樓下升咗兩成，至今日突破埋180元，升幅已達兩成，小心業績後嚟個反高潮。至於京東(09618)表現無美團咁勁揪，不過都由200元升咗超過一成，順利突破220元，但要再上240元，似乎就難度大增。
內地噚日發布《關於促進新時代新能源高質量發展的實施方案》，錨定到2030年中國風電、太陽能發電總裝機容量達到逾12億千瓦，並加快構建清潔低碳，電力股整體走強。成個電力板塊，半日升幅閒閒地超過3%，個別股份升幅更超過一成，有貨喺手可以考慮食糊減磅。上海明日起全面解封，回復正常生產同生活秩序，內需股續有炒作，無論消費股跟餐飲股都見資金追捧，不過相關股份升勢能否持續，阿Man係有保留，尤其大市已反彈逾千點，喺21000水平上再追貨值博率有限，無貨寧願等下一個機會，阿Man傾向相信大市仍處於上落市格局，要回復強勢言之尚早，既然如此，就無理由喺移動區間頂部嚟追貨。
麥狄文
(徐狄怡‧證監會持牌人)
