2022年3月22日
隔晚美國聯儲局主席鮑爺指目前嘅高通脹，需要更積極收緊貨幣政策應對，即係嚟緊下次議息會議，好有可能加息幅度將提高至0.5厘。因為鮑爺口風又偏鷹咗啲，美股隔晚都縮一縮，道指結束五連升，回201點，標指跟納指都有少少腳軟，不過跌幅尚算溫和。至於港股上周V彈後回返少少，今早又上返二百幾點。
恒指高開97點報21319，大市表現反反覆覆，一度升逾200點後升幅突然收窄至45點，見21266半日低位。不過低位又見買盤收集，大市重拾動力，最多升269點，見21491半日高位。恒指半日收報21461，升239點；國指升109點，報7353；恒科指升61點，報4477。半日成交縮水得返635.58億元，反映經過上周鐘擺效應後，缸邊友對大市熱情急降，大市可能又進入買賣兩閒嘅悶局。
講真個市由18200反彈至接近22000水平，短時間內咁急嘅反彈，好大原因係因為淡友要冚空倉，冚完一輪空倉，又唔存在要沽返啲貨出去，咁暫時又見唔到有新資金流入，自然就進入唔上唔落嘅整固階段。藍籌股個別發展，阿里(09988)宣布加碼股份回購計劃，股價半日升4.8%，但大家應該唔會忘記小米(01810)過去一年多次回購，股價一樣級級落，所以回購未必一定係一間公司嘅靈丹妙藥，反而公司嘅發展前景更加重要，暫時就睇唔到阿里前景有幾勁，只係勝在公司估值低，嚟到呢啲位，跌極已開始有個譜。
呢邊就話阿里加碼回購受追捧，那邊廂隻煤氣(00003)就相反，因為公司取消派發紅股，股價半日急跌近成半，成為表現最差藍籌股。以公用股嚟計，預測市盈率喺廿倍以上嘅煤氣，真係一啲都唔算平，家吓仲唔派紅股，即係連之前唯一吸引力都無埋，股東狠心分手亦好正常。
石油股跟電力股今日表現唔差，隔晚油價急漲，推動石油股走高，「三桶油」以中海油(00883)至叻，半日升4%；中石油(00857)升幅接近3.9%；中石化亦錄得(00386)1.9%升幅。其他油服務亦見有資金追捧，普遍升幅超過1%。電力股阿Man最愛龍頭當然係龍源電力(00916)，短線上落區間喺15.8至17元左右，有貨到價點都要食返半鋪糊。
至於大市點睇，暫時阿Man對後市仍然睇高一線，首先係沽空冚倉盤，唔存在掃完貨升咗等食糊，即係短線回吐壓力唔大，而投資氣氛亦漸好轉，加上外圍暫時未有爆出有力度嘅負面消息，經過上星期見咗18200國家隊入場嘅「政策底」後，相信港股急彈後將作整固，反彈支持位大約喺20500至21000，阻力當然係22000，要上23000就更待確認，能否進一步突破，暫時仍有待觀察。
麥狄文
(徐狄怡‧證監會持牌人)
